Taldyqorǵanda QR Qarýly kúshteriniń 25 jyldyǵyna oraı Aýǵan soǵysy ardagerleriniń arasynda voleıboldan respýblıkalyq týrnır bastaldy. Týrnırdi Almaty oblysynyń ákimi Amandyq Batalov ashty.
«Bul báseke el kóleminde budan keıin de ıgi dástúrge aınalyp, sportsúıer qaýymnyń ıgi sharasyna aınalady dep senemiz», dedi óńir ákimi.
Aýǵan ardagerleri atynan «Aýǵan soǵysy múgedekteriniń respýblıkalyq uıymy» qoǵamdyq birlestiginiń tóraǵasy, Keńes Odaǵynyń batyry Nıkolaı Kremenısh sóz alyp, týrnırdi uıymdastyrýshylarǵa rızashylyǵyn bildirip, sáttilik tiledi.
Jalpy, bul sporttyq jarysty ótkizý týraly usynys oblys ákimi A.Batalovtyń osy jyldyń aqpan aıynda aýǵan soǵysy ardagerlerimen kezdesýi barysynda aıtylǵan bolatyn. Usynysqa ákimdik tarapynan qoldaý kórsetilip, júzege asyrylyp otyr. Elimizdiń túkpir-túkpirinen 9 komanda qatysqan jarys eki kúnge sozylady.
Nurbol Áldibaev, «Egemen Qazaqstan»