Elimizde alǵashqy kásipkerlik qozǵalystyń qalaı qalyptasqany kóz aldymyzdan ótti desek, artyq aıtqandyq bolmas. Shynyn aıtqanda, ol qytaıdyń ala sómkesin arqalaýdan bastalǵan bolatyn. Sol kezde Qytaı men Túrkııadan, Reseıden taýarlardy kóbinese áıelder tasymaldaıtyn. Qazir endi osy kórinis sap tyıyldy. Nege? Sebebi, óz elimizde de jaqsy taýarlar shyǵaryla bastady. Bir Astananyń ózinde qanshama shaǵyn kásipkerlik sýbektileri ómirge kelip, halyq úshin qajetti zattardy óndirýde. Máselen, «Sıtsevyı raı» JK tósek jabdyqtaryn, «ULPA» JK matrastar, «Shortandy shujyqtary» JShS shujyq ónimderin, «Shýjın» JK jarma ónimderin shyǵarsa, «Vesta» tigin salony» JShS, «KZline» JShS, «Baıqadam servıs» sekildi fırmalar túrli sándi kıimder tigip, tutynýshylar alǵysyna bólenip júr. Bir kezderi mekemeler men halyqqa dezınfeksııalyq qyzmet kórsetetin «Qazaqstan meddez» JShS bul kúnderi osy qyzmetpen qatar medısına salasynda kóptegen gıgıenalyq zattar shyǵaratyn boldy. Qazirgi kúni bulardyń barlyǵy «Halyq markasy» baıqaýyna qatysyp, óz ónimderiniń ótimdiligin tutynýshylar arasynda synǵa salýda. Tutynýshy halyqtan kim kóp daýys alady, sol júzden júırik atanyp, óz bıznesterin odan ári keńeıte túsýge múmkindik alady. Iаǵnı tanymaldyǵyn arttyra túsedi. Demek, shaǵyn jáne orta kásipkerler arasynda endi sapa úshin, brendtik ataq úshin kúres bastalyp otyr. Osynyń barlyǵy elimizdegi kásipkerlik qozǵalystyń keńinen qanat jaıǵandyǵynyń dáleli. Árıne, bárin birdeı jazý múmkin emes. Sondyqtan biz osy maqalamyzda Arshaly aýdanynyń Astana irgesinde turǵan Jibek joly kentinde jumys isteıtin «Jámıla» JShS-iniń ǵana jumysyna toqtalyp óteıik. Bul seriktestiktiń qurylǵanyna kóp ýaqyt óte qoıǵan joq. Onyń túrli jıhazdar shyǵaratyn fabrıkasy osydan eki-úsh jyldaı ýaqyt buryn ǵana «Bıznestiń jol kartasy-2020» baǵdarlamasynyń kómegimen atalǵan aýyldan boı kótergen bolatyn. Bul fabrıka bir aıdyń ishinde 15 myń túrli jıhaz shyǵarýǵa qabiletti. Búgingi kúni «Jámılanyń» ónimderi Astana naryǵyn keńinen jaýlaı bastady. Sebebi, shyǵarǵan ónimderiniń baǵalary arzan. Máselen mektep oqýshysynyń ústeli men oryndyǵynan turatyn jıyntyq ónimniń baǵasy 8 myń teńgeniń arǵy jaq-bergi jaǵynda. Mundaı sapaly da arzan ónimdi qazir qaı jerden taba alasyz? Sondyqtan qazir fabrıka ónimderimen tanys biraz jurt «Jámılanyń jıhazdary-aı» dep tamsanatyn bolyp júr. Ásirese, onyń ofısterge arnalǵan túrli jıhazdary, kıim ilgishteri sándiligimen kóz tartady. Seriktestik basshysy Ertaı Qalııaqperovtyń aıtýyna qaraǵanda, bul óndiris orny da alǵashqy qyzmetin saýda salasynan bastaǵan sekildi. Osylaısha birqatar jyldar boıy halyqqa qyzmet kórsete kele ózi ornalasqan óńirdegi rynok jaıyn jaqsy meńgergen. Sonan keıin óz ónimderimizdi shyǵarsaq degen oı paıda bolǵan. Osy ıdeıany alǵa jyljytý úshin senimdi áriptes izdegende tańdaý Almatynyń «Zeta» óndiristik kompanııasyna túsipti. Sebebi, «Jámıla» seriktestigi biraz jyldar boıy osy kompanııanyń ónimderin saýdalap, onyń ótimdiligin ańǵarǵan. Sóıtip otandyq rynoktyń eń aldyńǵy qatarly kompanııalarynyń biri «Zeta»-men áriptestik qatynasqa súıengen «Jámıla» óziniń óndiris salasyndaǵy alǵashqy qadamdaryn senimmen arshyndaı bastady. Tek ótken jyldyń ózinde ǵana 33 mıllıon teńgeniń 157 jańa dúnıesin shyǵarylýy onyń alǵashqy qadamdarynyń ózi sáttilikpen bastalǵandyǵyn bildiredi. О́ıtkeni, «Jámıla» qazirgi kúni óz taýarlarymen qatar atalǵan alyp kompanııanyń ónimderin de saýdalap, ekijaqty tıimdi qatynasqa jaqsy demeý bolyp júr. Seriktestikte qazirgi kúni 130-ǵa tarta adam eńbek etedi. Astananyń irgesinde ornalasqan aýyldan osynshama jumys ornynyń ashylýynyń ózi halyq úshin jaqsy qoldaý ekeni anyq. Aldaǵy ýaqytta seriktestik ózinde eńbek etetinderdiń sanyn 200-ge deıin jetkizbek. Jańa ónimder shyǵarýdy ıgermek. Seriktestik qazirgi kúni elimizdegi brendtik taýarlardy anyqtaý jónindegi «Halyq markasy» baıqaýyna qatysýda. Bul baıqaýdyń jeńimpazdaryn onlaın daýys berý arqyly tutynýshy halyqtyń ózi anyqtaıtyn bolady. Eger «Jámıla» shyǵaratyn buıymdar túrine toqtala ketsek, olardyń qatarynda ofıstik korpýstyq jıhazdar, ústelder men oryndyqtar, ártúrli yńǵaıly da sándi kreslolar, otqa janbaıtyn shkaftar, kıim ilgishter, qundy qujattar men aqsha qarajatyn saqtaýǵa arnalǵan seıfter bar. Seriktestik arnaýly tapsyrys boıynsha medısınalyq kabınetterge arnalǵan túrli qural-jabdyqtardy da shyǵara alady. Jalpy aldaǵy ýaqytta ózderinde shyǵarylatyn jıhazdar túrin 180-ge deıin jetkizýdi kózdep otyr. Suńǵat ÁLIPBAI, «Egemen Qazaqstan».