Qazir elimizde kásipkerlik bilimge qajettilik artqany erekshe baıqalady. Bul týraly búgin Premer-Mınıstr Baqytjan Saǵyntaevtyń qatysýymen ótken «Atameken» ulttyq kásipkerler palatasy tóralqasynyń keńeıtilgen otyrysynda málim boldy.
«Elde bilikti mamandarǵa muqtajdyq qalyptasyp otyr. Bizde aıaq kıim jasaýshylardy, tiginshilerdi, úı qusyn ósirýshilerdi daıyndamaıdy. Al qaptaǵan qarjyger, zańger, baǵdarlamashy dıplomdary bar joǵary oqý oryndarynyń túlekteri jumys taba almaı júr. Sondyqtan kásipkerlik ýnıversıtetteri jelisine zárýlik sezilýde. Kásipkerlik salada bilim berý standarty qabyldanyp, ony JOO men kásiptik-tehnıkalyq oqý oryndarynyń negizine aınaldyrý kerek», dedi Qyzylorda oblysy Servıs jáne qyzmet kórsetý salasy kásipkerleri qaýymdastyǵynyń prezıdenti Erlan Raıymov . Sonymen qatar ol kásipkerlik saladaǵy ótkir maman tapshylyǵyna alańdaýshylyǵyn jetkizip, bul, ásirese shaǵyn bıznes baǵytynda óte ózekti ekenin aıtty.
Basqosýda «Alageum Gruop» JShS baqylaýshy keńesiniń tóraǵasy Saıdolla Qojabaev sóz sóılep, ǵylymı eńbekterdi qarjylandyrý, otandyq kásipkerlerdiń granttarǵa qol jetkize almaýy, kadr daıarlaý sapasy syndy máseleler týraly oı qozǵady.
Ashat Raıqul, "Egemen Qazaqstan".