«Bolashaq» baǵdarlamasymen bakalavrıat boıynsha oqý múmkinshiligi qaıta qolǵa alynýy múmkin. Bul týraly búgin Ortalyq kommýnıkasııalar qyzmetindegi brıfıngte «Halyqaralyq baǵdarlamalar ortalyǵy» AQ Prezıdenti Janbolat Meldeshov məlim etti, dep habarlaıdy QazAqparat.
«Mınıstrlik (Bilim jáne ǵylym mınıstrligi) «Bolashaq» baǵdarlamasymen bakalavrıat boıynsha oqýdy qaıtarý máselesin qarastyryp jatyr», – dedi ol BAQ ókilderiniń saýalyna oraı.
Onyń atap ótýinshe, aldaǵy ýaqytta mundaı múmkinshilik mektepti eń úzdik bitirgen túlekterge berilýi yqtımal. Jalpy, Janbolat Meldeshovtiń atap ótýinshe, 23 jyl ishinde «Bolashaq» stıpendııasy aıasynda ulttyq ekonomıkanyń túrli salalary úshin 9 339 maman daıarlandy. Olardyń arasynda 2 000-nan asa ınjener, 2 000-ǵa jýyq mektep jáne joǵary oqý oryndarynyń ókilderi, el óńirlerine arnalǵan 600 dáriger, 400 memlekettik qyzmetshi, 200 shyǵarmashylyq salasynyń qyzmetkeri jáne 2 000-nan asa ulttyq jáne jeke kompanııa mamandary bar.
«Memleket basshysy qazaqstandyq ulttyń joǵary biliktiliginiń memlekettiń básekege qabilettiliginiń negizgi faktory ekendigin birneshe ret atap ótken bolatyn. «Bolashaq» baǵdarlamasy jıyrma jyldan asa ýaqyttan beri zamanaýı joǵary jáne joǵary oqý ornynan keıingi bilim flagmany bola otyryp, joǵary bilimdi ulttyń qalyptasýyna óziniń aıtarlyqtaı úlesin qosyp keledi. Túlekterdiń 100 paıyzy jumysqa ornalastyryldy desek te bolady. Bıyl 544 úmitkerge «Bolashaq» stıpendııasy taǵaıyndaldy», – degen edi ol.