Qazaqstan kásipqoı fýtbol lıgasy Instat kompanııasynyń analızin paıdalana otyryp, 2016 jylǵy Premer-Lıganyń úzdik qaqpashylaryn jarııalady, dep habarlady sports.kz.
«Astananyń» qaqpashysy Nenad Erıch óz pozısııasynda ótken maýsymnyń úzdigi atandy. Onyń ındeksi – 203-ke teń. Mundaı sheshim shyǵarýǵa onyń qaıtarǵan soqqylarynyń sany, seıvteri, qarsylasymen jeke shyqqandaǵy oıyny, dál bergen pastary (uzyn, qysqa, konstrýktıvti) t.b. negiz boldy.
Elimizdiń úsh dúrkin chempıony atanǵan tájirıbeli qaqpashy bıylǵy maýsymda 30 oıynǵa (2850 mınýt) qatysyp, 21 gol jibergen. Sonymen qatar, 79 soqqyny qaıtarǵan jáne 29 seıv jasady. Qarsylasymen jeke shyqqan kezde de sátti (95%) oınaǵan. Al pastarynyń dáldigi 81%-ǵa teń.
Ekinshi orynda – Reseıdiń «Rostov» komandasynan jalǵa alǵan «Qaırattyń» golkıperi Stas Pokatılov. Onyń ındeksi 201-di quraıdy. Ol barlyǵy 8 oıynǵa (763 mınýt) qatysyp, 6 gol jibergen. Bul oıyndarda 24 márte (80%) soqqy qaıtara bilgen. Bul qaqpashylar arasyndaǵy úzdik kórsetkish. Qarsylasymen betpe-bet shyqqandaǵy kórsetkishi de kóńil tolarlyq, 87%-dy quraıdy. Sondaı-aq, 84% dál pas bergen.
Úshinshi orynda – Kókshetaýdyń «Oqjetpesinde» oınaıtyn Sasha Stamenkovıch. Bul qaqpashynyń ındeksi – 197. Barlyǵy 29 oıynda (2756 mınýt) 40 dop jibergen. Chempıonatta 112 soqqyny qaıtaryp, bul kórsetkishte úzdik nátıjege qol jetkizdi. Sınegorııalyq golkıper 55 seıv jasapty. Qarsylasymen jeke shyqqandaǵy kórsetkishi 90%-ǵa, al pastarynyń dáldigi 77%-ǵa teń.
Tórtinshi orynda – Almat Bekbaev («Ordabasy»), besinshi orynda – Denıs Tólebaev («Aqjaıyq»), altynshy orynda – Anton Sırın («Ertis»), jetinshi orynda – Davıd Lorııa («Ertis»), segizinshi orynda – Jasur Narzyqulov («Atyraý»), toǵyzynshy – Aleksandr Grıgorenko («Taraz»), onynshy – Samat Otarbaev («Aqtóbe»).