Astanadaǵy Ulttyq mýzeıde «Respýblıkalyq «Kazahstanskaıa pravda» gazeti» aksıonerlik qoǵamy mereıli merekemiz – Táýelsizdiktiń 25 jyldyǵyna oraı uıymdastyrǵan «Meniń Qazaqstanym» atty fotokórme saltanatty túrde ashylyp, gazet ujymy muryndyq bolǵan fotobáıge jeńimpazdary marapattaldy.
Merekeli jyly «Kazahstanskaıa pravda» gazetinde foto sheberleriniń mártebesin arttyryp, ónegeli ónerde baqtaryn synap kórýi úshin «Meniń Qazaqstanym» taqyrybymen fotobáıge jarııalanǵan bolatyn. Sodan bergi mezgilderde elimizdiń ár aımaǵynan redaksııa qorjynyna 60 fotosýretshiniń 600-den astam týyndysy kelip túsip, onyń eń úzdikteri gazet betinde jarııalanyp otyrdy. Al búgingi myna Ulttyq mýzeıdiń kórme zalyna ártúrli taqyryptardy qamtyǵan, sonyń ishinde eń negizgisi – fotosýret arqyly týǵan ólkemizdiń sulýlyǵyn, tabıǵatyn jáne ony mekendegen otandastarymyzdyń adamı kelbetin ár qyrynan beınelegen «Meniń Qazaqtanym» baıqaýyna qatysýshylardyń 40-tan astam úzdik týyndylary qoıylyp, kórermen nazaryna usynyldy.
Basqosý barysynda Ulttyq mýzeı dırektory Darhan Myńbaı, «Respýblıkalyq «Kazahstanskaıa pravda» gazeti» aksıonerlik qoǵamy Basqarma tóraǵasynyń orynbasary Aleksandr Tarakov pen osy gazettiń fototilshisi Igor Býrgandınov sóz sóılep, fotoónerdiń qyr-syry men mán-maǵynasyna keńinen toqtalyp, búgingi jeńimpazdarǵa sheberlik shyńyna órleı berýlerine tilektestik bildirdi.
Qazylar alqasynyń sheshimimen báıge jeńimpazdary bolǵan júldegerlerdi «Respýblıkalyq «Kazahstanskaıa pravda» gazeti» aksıonerlik qoǵamynyń Basqarma tóraǵasy Vıacheslav Pashenko quttyqtap, arnaıy marapattaryn tabystady. Atalǵan baıqaýda «Aýyldaǵy jaz» atty týyndysy kózaıym bolǵan Aıtjan Murzanov (Almaty qalasy) birinshi oryndy ıemdense, jastardyń áskerı-patrıottyq jıyny barysynda túsirilgen týyndysy úshin aǵa serjant Dýman Qurmanǵalıev (Qaraǵandy qalasy) ekinshi júldeni enshilep, Sergeı Sýrov (О́skemen qalasy) óziniń «Aq arýanasymen» úshinshi báıgeni oljalady.
Berik SADYR,
«Egemen Qazaqstan»
Sýretterdi túsirgen
Orynbaı BALMURAT,
«Egemen Qazaqstan»