Búgin QR Premer-Mınıstriniń orynbasary – Aýyl sharýashylyǵy mınıstri A.I. Myrzahmetov QR Parlament Senatynda «Qazaqstan Respýblıkasy Jer kodeksiniń jekelegen normalarynyń qoldanysyn jáne «Qazaqstan Respýblıkasynyń Jer kodeksine ózgerister men tolyqtyrýlar engizý týraly» 2015 jylǵy 2 qarashadaǵy QR Zańynyń qoldanysqa engizilýin toqtata turý týraly» QR Zańyna ózgerister engizý týraly» QR Zańynyń jobasyn tanystyrdy, dep habarlaıdy Aýyl sharýashylyǵy mınıstrligi.
Senat depýtattary zań jobasyn taldaı otyryp, qazirgi tańdaǵy Jer zańnamalaryna sáıkes, jer ýchaskeleriniń ınvestısııalyq jobanyń, onyń ishinde aýyl sharýashylyǵy salasynda iske asyrylýyn júzege asyratyn Qazaqstan Respýblıkasynyń zańdy tulǵasyna zattaı granttar retinde berilýi múmkin bolyp otyrǵanyn sóz etti.
«Osyǵan baılanysty mynadaı suraqtar týyndaıdy: moratorıı osy tulǵalarǵa da qatysty bolady ma, eger qatysty bolsa, ınvestısııalyq sharttarǵa ózgerister engizilýi múmkin be?», – dep saýal tastady depýtattardyń biri.
Bul oraıda, A.Myrzahmetov Jer Kodeksiniń 24-babyna sáıkes, Memlekettik menshiktegi aýyl sharýashylyǵy maqsatyndaǵy jer ýchaskeleriniń osy Kodekste belgilengen tártippen jáne sharttarda Qazaqstan Respýblıkasynyń azamattaryna jáne zańdy tulǵalaryna jer paıdalaný quqyǵymen berilýi múmkin ekendigin aıtty.
«Biraq, aýyl sharýashylyǵy maqsatyndaǵy jer ýchaskelerin aýyl sharýashylyǵy óndirisin júrgizý úshin memlekettik zattaı granttar retinde jeke menshikke berýge jol berilmeıdi. Tek qana jalǵa beriledi. Sondyqtan, moratorıı teris áserin tıgizbeıdi», – dep atap ótti Vıse-Premer.