Elbasy Astanada Qazaqstan xalqy Assambleıasy etnomádenı birlestikteriniń «Beıbitshilik pen kelisimniń 25 jyly» festıvalinde nemis, káris jáne uıǵyr teatrlaryna akademııalyq mártebe bergenin málim etti, dep xabarlaıdy QazAqparat.
«Memleket turaqty túrde barlyq etnomádenı birlestikterge qoldaý jasaýda. Balalar úshin keshki mektepterdi ashyp, ózderiniń ana tilderin oqýǵa múmkindik berýde. Bizdiń gazet-jýrnaldar 15 tilde, teatrlar 7 tilde sóıleıdi. Bundaı ózge eldiń eshbirinde joq. Búgin osy festıvalda 3 ulttyq teatrǵa - nemis, káris jáne uıǵyr teatrlaryna akademııalyq mártebe berý jónindegi sheshimimdi jarııalaımyn. Bul sheshim bizdiń eldiń barsha teatr ónerine úlken serpin beredi dep senemin. Teatr ujymyn osynaý keremet oqıǵamen quttyqtaımyn. Joǵary shyǵarmashylyq tabys tileımin!», - dedi N. Nazarbaev festıvaldiń ashylý saltanatynda.
Aıta keteıik, búgingi forým barysynda Qazaqstan xalqy Assambleıasynyń bastamasymen qolǵa alynǵan birqatar baıqaýlarlyń qorytyndysy shyǵarylady. Al etnomádenı birlestikter «Beıbitshilik pen jasampazdyqtyń 25 jyly» atty teatrlandyrylǵan kórsetilimin qoıady. Onda Qazaqstannyń Táýelsizdik jyldaryndaǵy tarıxı jetistikteri kórinis tappaq.