Elordadaǵy «Áziret Sultan» meshitiniń dinı saýat ashý kýrsynda dáris alatyn shákirtter arasynda uıymdastyrylǵan bilim baıqaýy óz máresine jetti. El Táýelsizdiginiń 25 jyldyq mereıtoıyna oraı uıymdastyrylǵan «Paıǵambar (s.ǵ.s.) úıretken namaz» atty saıystyń aqtyq aınalymy juma namazynan keıin jamaǵat aldynda ótti.
«Qazirgi tańda meshitimizde bilim alyp jatqan 600-den astam shákirt bar. О́tken jyly «Senimińe berik bol!» taqyrybynda saıys ótken. Igi bastama bıyl da jalǵasyn taýyp otyr. Búginde el arasyna iritki salyp, salt-dástúrimizdi teriske shyǵaratyn, jat aǵymnyń jeteginde júrgen otandastarymyz az emes. Sharanyń basty maqsaty – Ábý Hanıfa mázhabynyń negizinde namaz oqýdyń joldaryn kórsetip, dinı ekstremızmniń aldyn alý», – dedi meshit ustazy Farhad Isauly.
Baıqaý eki kezeńnen turady. 24 qarashada ótken alǵashqy aınalymǵa 112 oqýshy qatysyp, joǵary upaı jınaǵan alty úmitker aqtyq aınalymǵa joldama alǵan.
Qazylar alqasynda Astana qalasynyń Din isteri jónindegi basqarma jetekshisi Danııar Nurashuly, «Nur Astana» Ortalyq meshitiniń naıb ımamy Qabylbek Álipbaıuly, «Ás-Salam» meshitiniń bas ımamy Nurbol Aýbakırov boldy.
Nátıjesinde «Paıǵambar (s.ǵ.s.) úıretken namaz» saıysynyń I oryn júldesin Sanýev Nurhan jeńip alsa, II orynǵa Rahımov Qýat laıyq dep tanyldy. Al III oryn Ergashov Dáýrenbekke buıyrdy. Jeńimpazdarǵa baǵaly syılyqtar men «Alǵys hat» tabystaldy.
Aıan ÁBDÝÁLI,
«Egemen Qazaqstan»