Sońǵy eki aptanyń ishinde Syr boıynyń rýhanııat salasy bir emes, birneshe mańyzdy sharamen aıshyqtaldy. Táýelsizdiktiń 25 jyldyǵyna arnap oblys ákimdigi halyqaralyq aıtys ótkizdi. Árisi Qytaı, Mońǵolııa, Qyrǵyzstannan, berisi ózimizdiń elden aqyndar qatysyp, alamannyń kórkin qyzdyrdy. Bas júldege tigilgen jeńil kólikti qyzylordalyq Muhtar Nııazov, ekinshi kólikti Altaı asyp kelgen arqaly aqyn Ularbek Mınethanuly ıelendi.
Jyr eline ile-shala Arqa men Batystyń, Jetisý men Syrdyń sańlaqtary dástúrli oryndaýshylardyń respýblıkalyq óner festıvalinde kúmis kómeıden jyr tógiltti. Qazaqstannyń eńbek sińirgen qaıratkeri Almas Almatov, jyrshy Sáýle Janpeıisova, elimizdegi birden-bir manasshy Baıanǵalı Álimjanov, Jetisý, Arqa mektebiniń ókilderi Ramazan Stamǵazıev pen Erlan Rysqalı, Batys jyr mektebiniń oryndaýshysy Aıgúl Qosanova, Uljan Baıbosynova jáne taǵy basqalar tekti sózdiń tóresin terip aıtyp, qulaq quryshyn qandyrdy. Elmura Jańabergenova, Arnur Kósheneı, Serik Jaqsyǵulov, Kúnsulý Túrikpenova, О́mirqul Aınııazov tyńdarmannyń ystyq yqylasyna bólendi.
Aqynyn ardaqtaǵan el azbaıdy. Aqyn-dramatýrg Asqar Kirebaevtyń 70 jyldyǵyna oraı marqumnyń shyǵarmashylyǵy men eńbegin nasıhattaý sharalary ótkizilýde. Sonyń biri – oblystyq jas aqyndar músháırasy. Baq synaǵandar túrli taqyrypta jazǵan dúnıelerin oqyp, shyn júırikter daralanyp shyqty.
Sondaı-aq, jýyrda Qazaqstan Jazýshylar odaǵynyń múshesi, aqyn Shahızada Ábdikárimovtiń «Aqyl men sezim burqaǵy» atty poezııa keshi ótti.
О́tken ǵasyrdyń sekseninshi jyldary óleń patshalyǵyna talantty tolqyn keldi. Solardyń qatarynda alǵashqy jyr shýmaqtary 1975 jyly «Kóktem tynysy» kitabyna engen, búginde esimi elge málim Shahızada Ábdikárimov te bar. Ol aqyn atanyp qana qoıǵan joq. Qalalyq telearnany aıaqqa turǵyzýda talmaı ter tókti. Búginde ol qurǵan «Qoǵam TV» shyǵarmashylyq ujymy men materıaldyq-tehnıkalyq bazasy qalyptasqan aqparat quralyna aınaldy. Shahızada О́tetileýuly oblystyq máslıhattyń depýtaty retinde de óńirdiń ózekti máselelerin sheshýge úles qosty.
Aqynnyń shyǵarmashylyq keshi barysynda Qazaqstan Jazýshylar odaǵy basqarmasynyń hatshysy, aqyn Ulyqbek Esdáýlet jyly lebizin jetkizdi. Sondaı-aq, aqyn Júrsin Erman, ádebıetshi-ǵalym, UǴA korrespondent-múshesi Baýyrjan Omarov, Ulttyq telehabarlar taratý qaýymdastyǵynyń atqarýshy dırektory Sholpan Jaqsybaeva, «Nur Otan» partııasy oblystyq fılıaly tóraǵasynyń birinshi orynbasary Ibadýlla Quttyqojaev tilektestik bildirdi.
Osy keshte oblys ákimi Qyrymbek Kósherbaev kelesi jyldan bastap Syr elinde «Parasatty poezııa» atty aqyndar festıvalin ótkizý josparlanyp otyrǵanyn jetkizdi.
Túrkistandyq aıtysker Bekarys Shoıbekovtiń birde «Syrdan altyn shyqpaýy múmkin, biraq aqyn shyqpaýy múmkin emes» degeni bar. Nebir dúldúldi túletken topyraqtyń kıesi de osynda bolsa kerek.
Erjan BAITILES,
«Egemen Qazaqstan»
Qyzylorda oblysy