OPEK uıymy munaı óndirisi kólemin baqylaıtyn komıtet qurdy, dep málimdedi abctv.kz basylymy Venadaǵa OPEK elderi men oǵan kirmeıtin memleketterdiń jıynynda sóz sóılegen Katardyń energetıka mınıstri Muhammed bın Saleh as-Sadaǵa silteme jasap.
«OPEK óziniń 171-shi kezdesýinde uıymǵa múshe memleketterdiń óndirisi kólemin baqylap otyratyn komıtet qurdy. Quziretti organ uıymǵa kirmeıtin memleketterdiń de qanshalyqty munaı óndiretinin tekserip otyrady”, – dep málimdedi mınıstr.
Erterekte Venesýelanyń munaı ónerkásibi mınıstri Eýlohıo del Pıno OPEK-ke kirmeıtin memlekettermen birge munaı óndirisin azaıtý týraly ortaq mámilege qol jetkizgennen keıin osyndaı komıtettiń qurylatynyn málimdegen edi.
Venesýela mınıstriniń aıtýynsha, komıtet quramynda bes eldiń mınıstrligi bolady. Onyń úsheýi OPEK elderinen bolsa, ekeýi uıymǵa kirmeıtin memleketterden alynady.
Aıta keteıik, búgin OPEK pen oǵan kirmeıtin memleketter birigip táýligine 1,8 mln barrel qara altyn óndirisin azaıtý týraly ortaq kelisimge qol jetkizdi. Sonyń 1.2 mln barreli OPEK elderine tıesili bolsa, qalǵan 600 myń barreli uıymǵa kirmeıtin memleketter moınyna júkteldi.