Petropavlda 220 soltústikqazaqstandyq jańa páterge ıe boldy, dep habarlaıdy SQO ákiminiń baspasóz qyzmeti.
Táýelsizdiktiń 25 jyldyǵy qarsańynda 55, 75 jáne 90 páterli úsh úı paıdalanýǵa berildi. Qos merekemen qýanysh ıelerin oblys ákimi Erik Sultanov quttyqtady.
«Ár adam úshin jaıly baspana turaqtylyqtyń, berekeniń kepili. Sondyqtan, elimizde halyqty qoljetimdi turǵyn úımen qamtamasyz etý máselesine erekshe kóńil bólinýde. Bizdiń oblysta jyl saıyn turǵyn úı qurylysy artyp keledi. Byltyr ósim 17 paıyzdy qurasa, bıyl 20 paıyzdan astam kórsetkishke jetip otyr», – dedi aımaq basshysy. «Bereke» shaǵyn aýdanyndaǵy jańa úıler 2015-2019 jyldarǵa arnalǵan «Nurly jol» ınfraqurylymdy damytý baǵdarlamasy boıynsha «Qazaqstan turǵyn úı qurylys jınaq banki» AQ jelisimen salynǵan. Is-shara barysynda qonys ıelerin «Qazaqstan turǵyn úı qurylys jınaq banki» AQ basqarma tóraǵasynyń orynbasary Aıjan Medeýova da quttyqtady.
«Bizdiń óńirde baǵdarlama aıasynda 10 úı salynyp jatyr. Onyń úsheýin búgin qoldanysqa berdik. Áli 7 úı bar. Soltústik Qazaqstan oblysynda bizdiń bankpen 24 myń kelisimshart jasalǵan. Sizder bizge 10 mıllıardtan astam qarajatty senip tapsyrdyńyzdar», – dedi Aıjan Medeýova. «Qazaqstan turǵyn úı qurylys jınaq banki» AQ-nyń jergilikti atqarýshy organ salymshylary arasynan 220 otbasyna páter kiltteri tabystaldy. Saltanatty sharadan soń oblys ákimi Erik Sultanov qonys ıeleriniń páterlerin aralady.