Gennadıı Golovkınniń jattyqtyrýshysy Abel Sanches FightSpace-ke bergen suhbatynda meksıkalyq boksshy Saýl «Kanelo» Alvarespen jekpe-jek ótkizý jónindegi kelissózder týraly aıtyp berdi, dep habarlady vesti.kz.
«Bul jóninde promoýterimiz Tom Lefflerden suraǵanymda Golden Boy-dan Oskar jáne Erık Gomespen kelissózder júrgizip jatqanyn aıtty. Bul is áli jalǵasyp jatyr. Biraq naqty sheshim áli qabyldanbady», – dedi Sanches.
Golovkınniń kelesi qarsylasy amerıkalyq Denıel Djeıkobs bolýy múmkin.
«Djeıkobsty orta salmaqta álemdegi ekinshi úzdik boksshy dep sanaımyn, al birinshi – Golovkın. Djeıkobs Dmıtrıı Pırogtan jeńilgennen keıin segiz qarsylasyn nokaýtqa jiberdi. Ras, ol soqqysy kúshti, qaýipti qarsylas. Biraq Golovkınge osyndaı jigittermen judyryqtasýy kerek. Árıne, olar kelisip jatsa... О́kinishke oraı, kóbisi Gennadıge qarsy aıqasqysy keletinin aıtqanmen, is júzinde kelisimshartqa qol qoımaıdy», – dedi Abel Sanches.