Búgin Úkimet otyrysynda Ulttyń ekonomıka mınıstri Qýandyq Bıshimbaev turǵyn úı qurylysy salasyndaǵy barlyq resýrstardy biriktirgen «Nurly jer» baǵdarlamasy tujyrymdamasyn tanystyrý barysynda ıpotekalyq qaryzdardy sýbsıdııalaý týraly aıtty.
Mınıstr atap ótkendeı, tujyrymdamanyń basym baǵyttary: ıpotekalyq qaryzdardy sýbsıdııalaý arqyly ıpotekalyq nesıe berýdi qoldaý; qurylys kompanııalary úshin qaryz mólsherlemesiniń bir bóligin jabý jolymen jeke qurylys salýshylardy yntalandyrý; Turǵyn úı qurylys jınaq bankiniń salymshylary jáne ákimdikterde kezekte turǵan azamattar úshin «revolverlik» qaǵıdaty boıynsha nesıelik turǵyn úı qurylysynyń kólemin ulǵaıtý; halyqtyń áleýmettik jaǵynan osal toptary úshin satyp alý quqyǵynsyz jalǵa beriletin turǵyn úıdiń óńirlik qoryn qurý; qajetti ınfraqurylym júrgizý arqyly jeke turǵyn úı qurylysyn damytý.
«Ipotekalyq nesıeleý naryǵyn jandandyrý maqsatynda azamattarǵa bastapqy úı satyp alýǵa ekinshi deńgeıli bankter beretin ıpotekanyń paıyzdyq stavkasynyń bir bóligin memlekettiń sýbsıdııalaýy arqyly halyqtyń suranysyn yntalandyrý kózdelip otyr», dedi Q.Bıshimbaev.
Banktiń syıaqy stavkasyn jeti jyl boıy jylyna 17%-dan artyq emes mólsherde sýbsıdııalaý boljanýda. Túpkilikti qaryz alýshynyń ıpotekasyn 10%-ǵa deıin tómendetý úshin memleket syıaqy qunynyń 7%-na deıin jabýdy qamtamasyz etetin bolady. Sýbsıdııa qarajatyn tıimdi paıdalaný úshin Astana jáne Almaty qalalaryndaǵy halyqqa nesıe berýdiń shekti somasy 20 mln. teńgege jáne óńirlerde 15 mln. teńgege deıin 15 jyl merzimge belgilenetin bolady. Osyndaı shartpen ıpoteka berý kezinde nesıe boıynsha aı saıynǵy ortasha tólem Astana jáne Almaty qalalarynda 158 myń teńge, óńirlerde 116 myń teńge bolady.
Josparǵa saı, 15 jyl ishinde 14,7 mln. sharshy metr nesıelik turǵyn úı salynady, bul 245 myń otbasyn turǵyn úımen qamtamasyz etedi.
Dınara Bitikova, "Egemen Qazaqstan".