Qytaı ınvestory Kentaý qalasynda ken baıytý zaýytyn salady. Zaýyt qurylysyna 2 mln dollar baǵyttaý josparlanǵan, dep habarlady OQO Kásipkerler palatasynyń baspasóz qyzmeti.
Úshjaqty kelisimge ınvestor, Kentaý ákimdigi men óńirdiń Kásipkerler palatasy qol qoıdy. Zaýytta «Qazaqmys» jáne «Qazmyrysh» syndy ónerkásiptik alpaýyttar úshin sońǵy ónim - metallýrgııalyq salaǵa qajetti mys-altyn konsentratyn shyǵara otyryp, ken baıytýdy jolǵa qoıý josparlanýda.
«OQO Kásipkeler palatasyna ınvestorlardy tartý úshin járdem bergenine alǵys aıtamyz. Bizdiń tarapymyzdan ınvestısııalyq jobany iske asyrý úshin barlyq jaǵdaılar jasalady», - dedi Kentaý ákiminiń orynbasary Nurjan Táshimov. Kásiporynda jylyna 65 myń tonna, táýligine daıyn ónim - mys-altyn konsentratyn 200 tonnaǵa deıin shyǵarý josparlanýda. Kásiporyn iske qosylǵanda 100 adam jumysqa alynady. Memorandýmda eńbekke negizinen jergilikti turǵyndar tartylatyny kórsetilgen.