El Táýelsizdiginiń 25 jyldyq mereıtoıy qarsańynda Ońtústik Qazaqstan oblysynyń Sozaq aýdanynda 50 otbasy jańadan baspanaly boldy, dep habarlaıdy oblys ákimdiginiń baspasóz qyzmeti.
Teriskeılikterge turǵyn úılerdi berý saltanatty sharasyna Ońtústik Qazaqstan oblysynyń ákimi Janseıit Túımebaev qatysty. Oblys ákimi aýdan ortalyǵy – Sholaqqorǵan aýylynda «Qoljetimdi baspana – 2020» baǵdarlamasy aıasynda oblystyq bıýdjet esebinen salynǵan turǵyn úılerdiń kiltin jetim jáne ata-anasynyń qamqorlyǵynsyz qalǵan balalarǵa, múmkindigi shekteýli jandarǵa, kóp balaly analar men kezekte turǵan memlekettik qyzmetkerlerge tabystap, jańa qonystyń qutty shańyraqqa aınalýyn tiledi.
«Elý úı - elý otbasy - elý januıa. Osy elý otbasynyń árqaısysynda 4-5 adamnan bar dep eseptesek, búgin 200-ge jýyq sozaqtyq turǵynnyń qýanyshyna ortaqtasyp otyrmyz. Mundaı jaǵdaı óńirimizge «Nurly jol», «Qoljetimdi baspana - 2020» baǵdarlamasy aıasynda bólinip jatqan úlken qarjynyń arqasynda múmkin bolyp otyr. Bolashaqta osyndaı baǵdarlamalar arqyly kóptep aqsha bólip, búgingideı turǵyn úılerdiń salynýyna barynsha atsalysatyn bolamyz», – dedi J.Túımebaev.
Jańa qonystardyń irgetasy 2015 jyly qalana bastaǵan bolatyn. El Táýelsizdiginiń 25 jyldyq mereıtoıyna oraı, tabystalǵan baspanalar mereıli merekedegi úlken syı bolyp otyr. Al turǵyn úılerdiń qurylys jumystaryn «El Qurylys toby» JShS merdiger mekemesi júrgizdi.