Portýgalııa ulttyq quramasynyń jáne "Real" klýbynyń shabýylshysy Krıshtıaný Ronaldý 2016 jylǵy "Altyn dop" júldesiniń ıegeri atandy.
Bıyl bul syılyqtyń jeńimpazyn France football basylymy 30 jýrnalıstiń qatysýymen anyqtady. Saltanatty keshke Krıshtıaný Ronaldý qatysa almady. Qazir ol Japonııada "Realmen" klýbtar arasyndaǵy álem chempıonatyna daıyndyq ústinde.
2016 jyly ol Madrıdtiń "Realymen" Chempıondar lıgasyn, ÝEFA Sýperkýbogyn, sondaı-aq Portýgalııa ulttyq quramasymen Eýropa chempıonatyn jeńip aldy. Sonymen qatar, 54 match ótkizip, 51 goldyń jáne 18 nátıjeli pastyń avtory atandy.
Aıta keteıik, portýgal oıynshysy "Altyn dop" júldesine osymen tórtinshi márte qol jetkizip otyr. Buǵan deıin bul bıikten 2008, 2013 jáne 2014 jyldary kóringen edi.