Elsııar Qanaǵatov: Olımpııalyq jyl oljaly boldy

Bıylǵy jyl qazaq eli sportshylary úshin qorjyny júldege toly jyl boldy. Sańlaqtarymyz Olımpıada tórinen oryn alyp, kóptegen jahandyq jarystarda jarqyrap kórindi. Osylaısha jyldy jaqsy jetistiktermen qorytyndylaǵaly otyr. Bizdiń Mádenıet jáne sport mınıstrligine qarasty sport jáne deneshynyqtyrý komıtetiniń tóraǵasy Elsııar Qanaǵatovpen áńgimemiz osylar jaıynda órbidi. – Elsııar Baımuhameduly, bıylǵy jyldyń basty dodalary jaıly ne aıtar edińiz? – Jyldyń tabysty bolǵanyna esh kúmán joq. Munyń bastysy, Rıo-de-Janeıro qalasynda ótken XXXI jazǵy Olımpııa oıyndarynda elimizdiń ulttyq quramasy jaqsy óner kórsetti. Jal­py komandalyq esepte 17 medal alyp, burynǵydan ilgeri kettik. Munyń bárin men birinshi kezekte Prezıdent Nursultan Nazarbaevtyń sportqa degen qam­qor­lyǵynyń arqasynda múmkin boldy dep bilemin. Sondaı-aq, Mádenıet jáne sport mınıstrligi men Ulttyq olımpııalyq komıtet basshylarynyń birlesken jumysy óziniń oń nátıjesin berdi. О́zderińiz kýá bolǵandaı,tarıhta tuńǵysh ret Qazaqstan sportshysy sýda júzýden Olımpıadanyń altyn medalin aldy. Buǵan qol jetkizgen Dmıtrıı Balandın osylaısha otandyq sporttyń bir jańa paraǵyn aıqara ashty. Ár qazaq zańdy túrde úmitpen qaraıtyn bokstan da qur alaqan emespiz. Danııar Eleýsinov bizdiń tól salmaǵymyz retinde atalyp ketken 69 kıloǵa deıingi dárejede taǵy da týymyzdy bıik ustaı bildi. Buǵan qosa, Ádilbek Nııazymbetov qatarynan ekinshi ret kúmis medal alsa, Vasılıı Levıt buǵan birinshi ret enshi taqty. Al Oıyndar bas­talardyń aldynda biraz soqqy alyp qalǵan aýyr atletıka salasy bul synnan da abyroımen shyǵyp, ortaq qazanǵa 5 túrli medal saldy. Olardyń arasynan bul joly altynnan alqa taqqan sportshy – atyraýlyq Nıjat Rahımov shyq­ty. Al Jazıra Japparqul qazaq qyz­dary arasynan birinshi bolyp kúmis me­daldy qanjyǵaǵa baılady. Sońǵy kezderi úlken qarqyn­men damyp kele jatqan dzıýdo kúresinen de úmitimiz zor bolǵan, osyǵan oraı Eldos Smetov kúmis medalmen, Otgonseseg Gal­badrah qola medalmen el mereıin ústem etti. Bul joly kúres túrle­rinen jigitterimizdiń joly bolma­ǵany­men, qyzdar óte jaqsy nátı­je kórsetti. Joldama alǵan 4 qy­zymyzdyń barlyǵy úzdik bes­tikten kórinip, 3-ýi medaldyń aýy­lynan tabyldy. Shynynda 1 kúmis, 2 qola medal alý – qyzdar kúresinde buryn-sońdy bolmaǵan kórsetkish. Rıonyń aldynda ǵana Astanada ótken álem chempıonatynda aıdy aspannan bir-aq shyǵarǵan boksshy qyzdar Oıynda da eńsemizdi túsirmedi. Sóıtip, Darıǵa Shákimova qola medal alyp oraldy. Jeńil atlet Olga Rypakova álemniń úzdik jeńil atletteri sapynda ekenin taǵy da bir márte dáleldep, qola medal enshiledi. Jalpy, medal almaǵanmen, joǵary nátıje kórsetken sport túrleri de bar. Mysaly, eskek esýde Rıoǵa 13 lısenzııamen bardyq. Bizdiń sportshylar úshin úlken nátıje jáne olar aqtyq kezeńderge deıin jetti. – Rıoda Paralımpıada oıyndary da joǵary deńgeıde ótti. – Buǵan daý joq. Onda táýelsiz Qazaqstan tarıhyndaǵy alǵashqy altyn medal aldyq. Júzýden Zúlfııa Gabıdýllına 100 metrge erkin ádispen júzýde aldyna jan salmady. Ol ózi jasaǵan rekordty 4 sekýndtqa jańartty. Paýerlıftıng sportynan óner kórsetken 3 sportshymyzdyń biri – Raýshan Qoıshybaeva kúmisten alqa taqty. Sonymen qatar, júzý­­den Ánýar Ahmetov esimdi atle­timiz qola medalǵa sanaýly sekýnd jetpeı qaldy. Paradzıýdo sportyndaǵy úmitimizdi jaısyz kelgen jerebe buzdy. – Elsııar Baımuhameduly, elimizdegi balalar men jasós­pirimder sportynyń jaıy týraly ne aıta alasyz? – Qazirgi tańda elimizde 438 bala­lar men jasóspirimderge arnalǵan sport mektebi bar. Jyl saıyn ár oblysta jańa sport mektepteri ashylyp jatyr. Me­niń bilýimshe, naǵyz sportshylar qarapaıym otbasylarynan shyǵady. Ár bala ózi qalaǵan sport túrimen aınalysýǵa tolyq qu­qyly. Osyǵan baılanysty aqysyz túrde jumys júrgizetin sport mektepteri sanyn kóptep ashý jóninde másele qoıylyp keledi. Táýelsizdik alǵan jyldardan beri elimizde 63 stadıon, 5 336  sport alańy, 1 712 sport zaly, 35 sport saraıy boı kóter­gen eken. 2015 jyly respýblıkada qoldanysta bar 35 783 sport ǵımaratynyń 26 186-sy, sport mektepterin qosa alǵanda, bi­lim berý mekemelerine tıesili bolsa, tek 9 597-si ǵana dene shy­nyqtyrý-sporttyq maqsattaǵy nysandarǵa jatady. Sonymen birge, 2014 jylǵa qaraǵanda, sport ǵımarattary sany 857 birlikke ósti. О́ńirlerden alynǵan derekter 2014 jyly ǵımarattar sany 34 926 bolǵanyn kórsetse, 2015 jyldyń sońynda bul kórsetkishtiń 35 783 nysanǵa artqany belgili boldy. 2014-2015 jyldary elimizdiń 8 óńirinde 18 deneshynyqtyrý-saýyqtyrý kesheni salyndy. Bul jumys áli jalǵasyn tabady. Sol sııaqty Prezıdenttik syna­malar tapsyrý jumystary da jolǵa qoıylý ústinde. Bul joba­nyń basty maqsaty halyqtyń sport pen dene shynyqtyrýǵa degen yqylasyn arttyrý, sol ar­qyly salamatty ómir saltyn ustanýshylardyń deńgeıin anyq­taý bolyp tabylady. – Ulttyq sport túrlerine de erekshe kóńil bóline bastaǵany baıqalady. – Durys aıtasyz. Búginde ult­tyq sport túrleriniń damýy óte joǵary qarqyn alyp otyr. Esterińizde bolsa, 90-shy jyldary bul biren-saran báıge, balýandar kúresi sııaqty kishigirim jarystar ótkizip turýmen shektelip qala beretin. El táýelsizdigi aıqyn­dalyp, memleketimizdiń áleýeti artqan saıyn ózimizdiń ulttyq qundylyqtarymyzdy qaıta jandandyrýǵa da úlken jol ashyldy. Osy tusta kúres dese ishken asyn jerge qoıatyn biz úshin qazaq kúresiniń úlken bıikterden kórinýi – erekshe jetistik. «Qazaqstan barysy», «Eýrazııa barysy», «Álem barysy», «Jas barys» sııaqty dástúrli týrnırler men álem, Azııa chempıonattaryna qatysatyn sportshylar sany men oǵan den qoıǵan memleketter qatary kún artqan saıyn keńeıip keledi. At sporty túrleri de qazir eldiń erekshe nazarynda. Alaman báıgeler, aýdaryspaq, kókpardan Azııa chempıonattary ótip júr. Teńge ilý men qyz qýý tolyqqandy sporttyq jarysqa aınaldy. Qazaqtyń zııatkerlik oıyny – toǵyzqumalaq elimiz sheńberinen asyp, Eýropa qurlyǵyna jaıyla bastady. Ulttyq sportty damytý ár ýaqytta da basym baǵyttardyń biri bolyp qala beredi. – Áńgimeńizge rahmet. Áńgimelesken Serik PIRNAZAR, «Egemen Qazaqstan» ASTANA