«Astana» Prezıdenttik kásiptik sport klýbynyń «Fızkýlt-ýra» áleýmettik jobasy aıasynda olımpııalyq oıyndar chempıondary men belgili sportshylar oblys qalalary men aýdandaryndaǵy mektepterde bolyp, oqýshylarmen kezdesip, deneshynyqtyrý sabaǵyn ótkizgen bolatyn.
Rıo-de-Janeıro olımpıadasynyń kúmis júldegeri Vasılıı Levıt týǵan jerindegi ózi oqyǵan №1 Dmıtrov mektebine keldi. Mektep oqýshylary men ustazdary ony zor qýanyshpen kútip aldy. Týǵan jerdiń áýeni – dombyradan kúı tógilip turdy. Vasılıımen birge onyń ósken aýylyna grek-rım kúresinen 1996 jylǵy Atlanta olımpıadasynyń chempıony Iýrıı Melnıchenko de keldi. Aıta ketetini, Vasılııdiń anasy Tatıana Borısovna Levıt uly oqyǵan mektepti kóp jyldan beri basqaryp keledi.
Mekteptegi saltanatty kezdesýde aýdan ákiminiń orynbasary Murat Sandybaev chempıondar Vasılıı Levıt pen Iýrıı Melnıchenkony sporttaǵy jetistikterimen quttyqtady. Chempıondar oqýshylardy deneshynyqtyrýmen aınalysýǵa, sportty janyna serik etýge shaqyrdy.
– Sport adamdy shynyqtyryp, densaýlyǵynyń myqty bolýyna áser etip qana qoımaıdy, ol jastardy eńbekqorlyqqa, adaldyqqa tárbıeleıdi. Sportty jaqsy kórgen bala shymyr, kúshti bolady. Al kúshti adamdar ótirik aıtpaıdy, aınalasyna qurmetpen qaraıdy jáne Otanynyń patrıoty bolady, – dedi Vasılıı Levıt oqýshylarmen kezdesýinde. Balalar sportshyǵa: «Olımpıada chempıony bolý ońaı ma?» degen suraq qoıdy.
– Ylǵı eńbektenip, jigermen, tabandylyqpen jumys isteseń, tek sportta ǵana emes, ómirde kóptegen jeńisterge jetýge bolady, – dedi Vasılıı.
– Seni aınalańdaǵy jaqyn adamdaryń, otbasyń, jankúıerleriń qoldaǵanda, úlken sporttaǵy qıyndyqtardy jeńip, bıik belesterdi baǵyndyrýǵa bolady. Biraq eńbekqorlyq pen sportqa degen ynta-yqylas qazirden bastalýy tıis, – dep tolyqtyrdy áriptesiniń sózin Iýrıı Melnıchenko.
Aýyl balalary sportshylardyń áńgimesin zeıin sala tyńdady. Vasılıı men Iýrıı oqýshylarǵa qoltańba berip, olardyń qalaýynsha sýretke túskennen keıin, sport zalǵa ótip, 8-synypqa deneshynyqtyrýdan ashyq sabaq ótkizdi. Oqýshylar sportshylar kórsetken barlyq jattyǵýlardy oryndady. Aıtpaqshy, mundaı kezdesýlerdi Qostanaı qalasyndaǵy mektepterde bokstan London jáne Rıo-de-Janeıro olımpıadalarynyń qola júldegeri Ivan Dychko da ótkizdi.
Názıra JÁRIMBETOVA
«Egemen Qazaqstan»
Qostanaı oblysy,
Fedorov aýdany
Sýretti túsirgen
Márııam Orazbaeva