«Nur Otan» partııasy ónertapqysh jastar arasynda ótkizgen respýblıkalyq «NURINTECH» ınnovasııalyq jobalar baıqaýynyń qorytyndysyn jarııalady. Soǵan baılanysty keshe partııa Tóraǵasynyń birinshi orynbasary Muhtar Qul-Muhammed jeńimpazdardy marapattady.
Atalǵan baıqaýdy Memleket basshysynyń tapsyrmasymen bıyl «Nur Otan» partııasy jarııalaǵan bolatyn. Onyń basty maqsaty – jastardyń ǵylym men bilimge jáne ınnovasııaǵa degen qyzyǵýshylyqtaryn arttyrý. Al «NURINTECH» baıqaýy 5 atalym boıynsha ótkizildi. Olar: «áleýmettik mańyzy bar ınnovasııa», «tehnostart», «úzdik jas ǵalym», «jastar ınnovasııalyq jobasy» jáne «perspektıva». Ár atalymda úzdik úshtikter anyqtaldy. Sondaı-aq, baıqaý barysynda belsendi qatysýshylarǵa arnaıy syılyqtar taǵaıyndalǵanyn atap ótken jón.
Jalpy, elimizdiń ár túkpirinen baıqaýǵa qatysýǵa nıet bildirgen myńǵa jýyq ótinish kelip túsken. Olar negizinen jasyl energetıka, hımııa, bıologııa, óndiris, qurylys, aýyl sharýashylyǵy, medısına, robot tehnıkasyn jasaý, kólik jáne IT-ındýstrııa salasyndaǵy ınnovasııalyq jobalar. Solardyń arasynan sheshýshi kezeńge, ıaǵnı fınalǵa búginde suranysqa ıe, ekonomıkalyq jaǵynan tıimdi jáne meılinshe jetildirilgen 30 joba iriktelinip alyndy. Jeńimpazdardy anyqtaý úshin arnaıy táýelsiz komıssııa quryldy. Onyń quramynda belgili otandyq ǵalymdar, qoǵam qaıratkerleri, halyq qalaýlylary, memlekettik organ jáne bıznes-qoǵamdastyq ókilderi boldy.
Baıqaý jeńimpazdaryn marapattaý rásimindegi sózinde «Nur Otan» partııasy Tóraǵasynyń birinshi orynbasary ınnovasııaǵa salynǵan 1 dollardyń keıin eselep qaıtatynyna erekshe nazar aýdardy. «Jýyrda ǵana biz prezıdenttik Indýstrııalyq-ınnovasııalyq damý baǵdarlamasynyń kezekti belesine kýá boldyq. Elbasy bir mezette 23 jańa aýqymdy óndiris oshaǵyn iske qosty. Olardyń balamasy Qazaqstanda ǵana emes, búkil Ortalyq Azııada joq. Nursultan Ábishulynyń bul mega-jobasy qazirdiń ózinde elimizde myńnan astam iri kásiporynnyń ashylýyna múmkindik berdi. Olardyń jalpy quny 4,5 trln teńgeden astam qarajatty quraıdy. 100 myńnan astam jańa jumys orny ashyldy. Sol sebepti de Memleket basshysy ındýstrııalandyrý Qazaqstannyń eń basty mindeti ekenin únemi aıtyp júredi. Sondyqtan da partııa kóshbasshysy «NURINTECH» baıqaýyn jarııalaǵan bolatyn. Endi jas ǵalymdar men ónertapqyshtar Prezıdentimizdiń ınnovasııany damytýǵa baǵyttalǵan saıasatynyń basty qoldaýshylary bolýy tıis», – dedi Muhtar Qul-Muhammed.
Baıqaý qorytyndysy boıynsha 20 qatysýshy júldegerler qatarynan kórindi. Nátıjesinde Gran-prı men bas júlde – 2 mln teńgeni qaraǵandylyq jas ǵalym, alǵashqy otandyq drondy qurastyrýshy Nurjan Esmaǵambet enshiledi. Sonymen qatar, 1-oryn ıegerine – 1 mln, 2-orynǵa – 500 000, al 3-oryn alǵan qatysýshyǵa 250 000 teńge syıaqy berildi. Budan bólek, «perspektıva» atalymy boıynsha jeńimpaz atanǵan qatysýshyǵa Qazaqstannyń aldyńǵy qatarly joǵary oqý oryndarynyń birinde oqýǵa múmkindik beretin bilim granty qarastyrylǵan. Sondaı-aq, 2-shi jáne 3-shi oryn alǵan jas ǵalymdarǵa noýtbýk, planshet sııaqty baǵaly syılyqtar tabys etildi.
Marapattaý rásiminen soń, baıqaý jeńimpazdarynyń bireýin áńgimege tartqan edik. «О́skemen sý arnasy» memlekettik mekemesiniń ınjener-laboranty, «NURINTECH» respýblıkalyq ınnovasııalyq jobalar baıqaýynyń «Eń úzdik jas ǵalym» atalymy boıynsha 1-shi oryn ıegeri Aıgúl Sádýaqasova: «Ǵylym salasynda júrgen jas mamandar úshin «Nur Otan» partııasy ótkizip otyrǵan «NURINTECH» baıqaýynyń mańyzy zor. Men óz jobamda fosfor, kremnıı syndy buryn qoldanylmaǵan qoljetimdi ári arzan materıaldardyń kómegimen óndiris qaldyqtarynan ýrandy tıimdi aıyrý múmkindigin zerttedim. Qazaqstanǵa bul tásildi metallýrgııa salasynda jemisti qoldanýǵa bolady. Minekı, osy jobam arqyly búgin jeńiske jetip otyrmyn. Bul baǵasy maǵan artylǵan jaýapkershilik dep bilemin. Jeńip alǵan júldemdi ǵylymı jumysymdy odan ári jetildirýge jumsaımyn. Otandyq jas ónertapqyshtarǵa osyndaı zor múmkindik týǵyzǵan Elbasyna jáne «Nur Otan» partııasyna erekshe alǵysymdy bildiremin», – dedi.
Álısultan QULANBAI,
«Egemen Qazaqstan»