Qostanaıdaǵy «Medeý» meıramhanasynda «Jastardyń altyn kitaby» laýreattaryn marapattaý rásimi ótti. 2005 jyly bastalǵan dástúr on bir jyldan beri jalǵasyp keledi. Bıyl «Altyn kitapqa» laýreat bolǵan 12 jasqa oblys ákimi Arhımed Muhambetovtyń ózi sertıfıkattar tabys etti.
«Jastardyń altyn kitaby» bizdiń oblystaǵy jaqsy dástúrdiń biri. Ataqty sportshy jerlesterimiz olımpıada chempıondary, bokshylar Vasılıı Levıt, Ivan Dychko jáne konkımen syrǵanaýdan álem chempıony Denıs Kýzın «Altyn kitap» laýreattary bolatyn. Al «Jastardyń altyn kitaby» laýreattarynyń biri Álııa Saparova búginde respýblıka Parlamenti Májilisiniń depýtaty. «Altyn kitapqa» esimi engen oblys jastary qazir kásipkerlikte, ǵylymda, memlekettik qyzmette, taǵy basqa salalarda jemisti eńbek etip júr. Solardyń biri Erlan Qalmaqov oblysymyzdyń mádenıet salasyn basqarýdy qolǵa aldy. Laýreat jastar barlyq jaǵynan zamandastaryna úlgi», dedi Arhımed Begejanuly.
«Altyn kitaptyń» jańa laýreattary da ómirdiń ár salasynda úzdik atanyp júrgen jastar. Mysaly, Málıka Muhtarova arbada otyryp sporttyq-bal bıin bıleýden Azııa chempıony atandy. Málıka talantyn ushtaı túsýi úshin oblys ákimi Arhımed Muhambetov oǵan 1 mıllıon 200 myń teńge turatyn bıge arnalǵan arnaıy arba alyp berdi. Indıra Ivanova oblystaǵy «Til daryn» klýbyn basqarady. Ol ózge ult ókilderine memlekettik til úıretip, qazaq tilinde taza sóıleıtin jastardyń qataryn kóbeıtýge atsalysady. Ár laýreattyń osyndaı erekshe jetistigi, tabysy atap aıtyldy.
On bir jyldyń ishinde oblysta «Altyn kitapqa» 172 jastyń esimi altyn áriptermen oıylyp jazyldy. Olardyń ishinde 44 laýreat sporttaǵy, 23 laýreat mádenıet pen óner salasyndaǵy, 20 jas erlik kórsetkeni úshin, (olardyń bireýi qaıtys bolǵan soń), 7 jas densaýlyq saqtaý salasyndaǵy, 16 laýreat bilim salasyndaǵy úzdik jetistikteri úshin marapattalǵan edi. Olardyń barlyǵy da Qostanaı jastarynyń jarqyn ókilderi.
Názıra Járimbetova, «Egemen Qazaqstan».
Qostanaı