13 jeltoqsan kúni Qyzylordada qalanyń sol jaq jaǵalaýyn ıgerý baǵdarlamasy aıasynda salynyp jatqan úsh kópirdiń alǵashqysy saltanatty túrde paıdalanýǵa berildi. Qyzylorda oblysynyń ákimi Qyrymbek Kósherbaev turǵyndardy El Táýelsizdiginiń 25 jyldyǵymen jáne Syrdarııanyń sol jaǵalaýyndaǵy jańa qala qurylysynyń bastalýymen quttyqtady.
- Aldaǵy jyldan bastap, biz qalanyń sol jaq jaǵalaýyn keshendi túrde damytýdy, iri qurylys nysandaryn salýdy bastaımyz. Qurylys aýmaǵy 1500 gektardan astam jerdi qamtıdy. Aýqymdy jobany júzege asyrý maqsatynda oblystyq shtab quryldy. Jańa qala sáýletinde shyǵystyq úlgige basymdyq beriletin bolady. 11 shaǵyn aýdan, ındýstrıaldy aımaq jáne 3 saıabaq, sondaı-aq, halyqtyń sapaly ómir súrýine qajetti áleýmettik nysandar, bıznes ortalyqtary, saýda oryndary boı kóteretin bolady. Olardyń ishinde 46 balabaqsha, 23 mektep, stýdentter qalashyǵy, 2 kópsalaly aýrýhana, qarttarǵa arnalǵan pansıonat t.b salynady. Sonymen birge úlken teatr arenasy, etnografııalyq mýzeı, Qorqyt ata ınteraktıvti mýzeıi, balalar shyǵarmashylyǵy saraıy, saz mektebi, sırk, drama teatry, stadıon, «Qustar álemi» oranjereıasy jáne Medıa ortalyq pen demalys oryndary ornalasady. Sol jaǵalaý aýmaǵynda bolashaqta júz myńǵa jýyq adam turatyn bolady,– dedi oblys ákimi Q.Kósherbaev.
Aıta keteıik, Syrdarııa ózeni arqyly ótetin kópir qurylysy 2014 jyly bastaldy. Tapsyrys berýshi oblystyq jolaýshylar kóligi jáne avtomobıl joldary basqarmasy. Merdiger mekeme - «№ 25 A.Rıazanov atyndaǵy kópir qurylysy otrıady» JShS. Kópirdiń uzyndyǵy - 387 metr, 4 jolaqtan turady, árqaısysynyń eni – 3,5 metr. Júk kóterý múmkindigi – 180 tonna.