Táýelsizdiktiń 25 jyldyq mereıtoıy qarsańynda Qazaqstan Prezıdentiniń Jarlyǵymen Májilistiń bir top depýtaty memlekettik nagradamen marapattaldy, dep habarlaıdy.
Búgin depýtattarǵa nagradany Memleket basshysynyń atynan saltanatty túrde palata tóraǵasy Nurlan Nyǵmatýlın tabys etti.
«Qazaqstan úlken tabystarǵa, uly jeńisterge jetti. Álemdik deńgeıde abyroıly da bedeldi memleket boldy. Eń bastysy, elimizdiń berekeli birligi jáne yntymaǵy zor. Osyǵan jetken de, jetpegen de memleketter bar. Bul tikeleı Elbasynyń eren eńbeginiń jemisi. Elbasynyń saıasatynyń arqasynda úlken jeńisterge jettik. Ony bárimiz bilip, baǵalaýymyz kerek. Osy jolda barsha qazaqstandyq, sonyń ishinde sizderdiń de qosyp jatqan úlesterińiz óte zor», - dep atap ótti Májilis tóraǵasy Nurlan Nyǵmatýlın.
«Parasat», II deńgeıli «Dostyq», "Qurmet» ordenderi, «Eren eńbegi úshin», «Shapaǵat» medalderi men QR Qurmet gramotasymen memlekettik jáne qoǵamdyq qyzmette sińirgen eńbegi úshin 19 depýtat pen apparat qyzmetkeri marapattaldy.
Budan bólek, depýtattyq korpýstyń memlekettiń damýyna qosqan úlesi «Qazaqstan Respýblıkasynyń Táýelsizdigine 25» mereıtoılyq medalderimen atalyp ótti.
Sondaı-aq parlamentızmdi damytyp, parlamentaralyq yntymaqtastyqty nyǵaıtýǵa qosqan úlesi úshin bir top depýtat pen apparat qyzmetkeri TMD Parlamentaralyq assambleıasy men UQKU Parlamenttik assambleıasynyń nagradalaryna ıe boldy.