Gennadıı Golovkınniń jattyqtyrýshysy Abel Sanches «R-Sport» saıtyna bergen suhbatynda qazaqstandyq boksshynyń alǵa qoıǵan jospary, onyń joǵary salmaq dárejesine kóterilýi, sondaı-aq múmkin bolar qarsylastary jóninde áńgimeledi, dep habarlady vesti.kz.
«Golovkınniń 18 naýryzda óter jekpe-jegin HBO telearnasy tikeleı efırden kórsetedi. Biraq qarsylasy áli naqty jaýabyn bermedi. Denı Djeıkobspen kelissózder ázirge oıdaǵydaı júzege asyp jatyr. Ol orta salmaqtaǵy álemniń ekinshi úzdik boksshysy bolǵandyqtan bul kezdesý ótedi degen úmittemiz. Jekpe-jek bálkim Nıý-Iorkte ótip qalar. Bul tıtýldardy qorǵaý jekpe-jegi. Sondyqtan da Djeıkobs qalamaǵannyń ózinde kezdesý ótýi tıis",- dedi ol.
Golovkınniń naqty qarsylastary bar ma degen suraqqa: «Menińshe, dál osy Djeıkobs laıyqty opponentterdiń biri. Sondaı-aq, brıtanııalyq Bıllı Djo Sonders te tamasha boksshylardyń biri. GGG barlyq tıtýldarynyń basyn biriktirgennen keıin ekinshi orta salmaqqa kóshýge múmkindik alady. Ol jaqta Golovkınmen kezdeskisi keletin chempıon bar. Salmaǵyn aýystyrǵannan keıin óziniń shama-sharqyn anyqtaıdy. Eger unap jatsa, jartylaı aýyr salmaqqa da aýysýy múmkin. Al ary qaraı Andreı Ýord, Sergeı Kovalev syndy birqatar sportshylarmen kúsh synasa alady», – dedi ol.
Sonymen qatar, Saýl Alvarespen kezdesý uıymdastyrý jaıly da málimdedi: «Shynymdy aıtsam, bul tartysty ózim de asyǵa kútip júrmin. О́kinishke oraı, bul bizdiń kelesi jekpe-jegimiz emes. Eger de bul júzege asyp jatsa, boks tarıhyndaǵy úzdik báseke bolary sózsiz. Álem mundaı aıqasty buryn-sońdy kórmegen bolar edi», – dedi Sanches.