Jaqynda elordadaǵy Ulttyq akademııalyq kitaphanada el Prezıdentiniń BAQ salasyndaǵy syılyǵynyń laýreaty, «Daryn» memlekettik jastar syılyǵynyń ıegeri, Qazaq radıosy dırektorynyń orynbasary – Shalqar radıosynyń dırektory Bolatbek Tólepbergenniń «Qasıettim – Jeltoqsan!» atty kitabynyń tusaýkeser rásimi ótti.
El Táýelsizdiginiń 25 jyldyǵyna jáne 1986 jylǵy jeltoqsan oqıǵasynyń 30 jyldyǵyna oraı jaryq kórgen kitaptyń rásimine Parlament Senatynyń depýtaty Sársenbaı Eńsegenov, Májilis depýtaty Baqytbek Smaǵul, Qazaq radıosynyń dırektory Mahat Sadyq, jeltoqsanshylar, qoǵam qaıratkerleri, zııaly qaýym ókilderi men jastar qatysty.
Shara barysynda atalǵan kitaptyń mazmuny, onda qamtylǵan jaǵdaıattar keńinen sóz boldy.
Jıynda atap ótilgendeı, Bolatbek Tólepbergenniń «Qasıettim – jeltoqsan!» atty pýblısıstıkalyq kitabynda 1986 jylǵy Almaty qalasyndaǵy Jeltoqsan kóterilisiniń shyǵý sebep-saldary men oqıǵanyń órbý barysy keńinen qamtylǵan. Sonymen qatar, oqıǵaǵa qatysqan jáne odan keıingi kezde azamattyq ustanymyn kórsetken zııalylarymyzdyń, jastarymyzdyń qaısarlyǵy týraly syr shertiledi. Budan bólek, Jeltoqsan kóterilisiniń tutanýyna túrtki bolǵan jaıttardan bastap, jeltoqsandyq qaharmandardyń is-áreketteri ashyp kórsetilip, jeltoqsandyqtardyń birazynyń tizimderi men sol kóteriliske qatysqan jastardyń derekteri berilgen. Avtor Jeltoqsan kóterilisine qatysty tolyqqandy maǵlumatty naqty derektermen dáıektep, jeltoqsandyq zııaly qaýym bolmysyn ashýǵa umtyla otyryp, oqıǵanyń bizge beımálim qyrlaryn baıandaýdy maqsat tutqan.
Avtordyń bul tııanaqty eńbegi – qaharmandyq kúrestiń shynaıy beınesi men tolyq aqıqatyn ashýdaǵy saýapty da qajyrly talpynysy, ıgilikti istiń máýeli jemisi dep aıtýǵa tolyq negiz bar. Ásirese, kitaptyń «Jeltoqsan: Tanys ta beıtanys esimder» atty bólimine oqıǵa sebebinen mert bolǵandardyń, sottalǵandardyń, aýrýhanaǵa túskenderdiń, úı qamaǵyna alynǵandardyń, oqýdan, jumystan, partııa, komsomol qatarynan shyǵarylǵandardyń, jastarǵa arasha túsken azamattardyń aty-jónderi tiziminiń berilýi bul eńbektiń baǵasyn arttyra túskendeı.
Taǵy bir atap ótetini, kitapta jeltoqsanshylardy kimderdiń tergegeni, kimderdiń úkim shyǵarǵany týraly derekter de qamtylǵan. Memlekettik aıyptaýshylardyń da aty-jóni bar. Osydan otyz jyl buryn qazaqtyń órimdeı jastaryn sottaǵan sol sýdıalar búginde ne oılaıdy eken?
Atalǵan kitap Mádenıet jáne sport mınıstrliginiń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha 2000 danamen «Keremet medıa» baspasynan jaryq kórdi.
Joldybaı BAZAR,
«Egemen Qazaqstan»