Almatyda XXVIII Dúnıejúzilik qysqy Ýnıversıadanyń bastalatyn ýaqyty birte-birte jaqyndap keledi. Osyǵan oraı oǵan qatysatyn sportshylardyń da, jarysty qabyldaýshy nysandardyń da daıyndyqtary qyza túsýde.
Qazaqstan sportshylary qysqy Stýdenttik oıyndarǵa derbes eldiń komandasy sapynda qatysýdy 1993 jyldan bastady. Osy jyly bizdiń elimizde Stýdentter sporty federasııasy quryldy. Osy jyly komanda halyqaralyq arenada birinshi ret jarys jolyna shyqty. Bul polıaktyń Zakopane qalasynda jalaý jelbiretken Ýnıversıadamen tuspa-tus keldi. Onda respýblıka hokkeıshileri ózderiniń birinshi jarysynda-aq kúmis medaldyń ıegerleri atandy. Olar jolaı kezdesken qarsylastarynyń bárinen ótip, fınalda Kanada quramasymen kezdesti.
Sodan bergi jyldarda Qazaqstan delegasııasy 12 qysqy Ýnıversıadaǵa baryp qaıtty. Bizdiń sportshylarymyz sol saıystarda 32 medal jeńip alsa, olardyń 12-si altyn, 7-i kúmis jáne 13-i qola medal boldy. Sonyń ishinde ulttyq komandamyz 2005 jyly Avstrııanyń Insbrýk qalasynda qanat jaıǵan oıyndarda tabysty óner kórsetti. Osy Ýnıversıadada qazaqstandyqtar 4 altyn, 1 kúmis jáne 2 qola medal jeńip aldy. 2013 jyly Italııanyń Trentıno shaharynda kórik qyzdyrǵan Stýdentter oıynynan da qorjynymyz tolyp qaıtty. Munda qazaqstandyqtar 2 altyn, 2 kúmis jáne 1 qola medalǵa qol sozdy.
Al budan keıingi Ýnıversıadanyń tarıhta birinshi ret eki elde bólinip ótkizilgeni belgili. Osylaısha 2015 jyly ol aldymen Slovakııanyń Shtrbske-Pleso jáne Osrble eldi mekenderinde máreden shyqsa, sońy ıspannyń Granada qonysynda márege jetti. Nátıjesinde bizdiń stýdent-sportshylar 5 altyn, 6 kúmis medaldyń ıegerleri atanyp, jalpy esepte Reseı jáne Ońtústik Koreıa sańlaqtarynan keıingi úshinshi orynǵa taban tiredi.
Bizdiń sportshylar arasynan shańǵyshy Anastasııa Slonova erledi. Ol oıyndarda 2 altyn, 2 kúmis medalǵa qol jetkizdi. Altyn júldeni sondaı-aq, bıatlonshy Alına Raıkova, frıstaılshylar Iýlııa Galysheva men Pavel Kolmakov komanda qorjynyna saldy.
Al aldaǵy Ýnıversıadada bizdiń óz sportshylarymyzdan kútetin úmitimiz budan da kóp.