13 jeltoqsan kúni Nartaı Bekejanov atyndaǵy qazaq mýzykalyq drama teatrynda QR Táýelsizdiginiń 25 jyldyǵy qurmetine arnalǵan saltanatty jıyn ótti. Sharaǵa oblys ákimi Qyrymbek Kósherbaev jáne QR Ulttyq ekonomıka vıse-mınıstri Aıdar Áriphanov qatysty. Jıynda aımaqtyń táýelsizdik jyldaryndaǵy negizgi áleýmettik-ekonomıkalyq damý deńgeıi saralandy. Budan bólek, túrli salalarda eńbek etip júrgen 79 adam orden, medaldarmen marapattalyp, Qazaqstan Respýblıkasynyń Qurmet gramotalaryna jáne 4 ardager «Qyzylorda oblysynyń Qurmetti azamaty» ataǵyna ıe boldy.
Oblys ákimi Qyrymbek Kósherbaev atap ótkendeı, Qyzylorda oblysy shırek ǵasyr ishinde ekonomıka men ónerkásiptiń barlyq salalarynda turaqty damýǵa qol jetkizdi.
- 2017 jyldan bastap oblysta Qazaqstandaǵy alǵashqy shyny zaýyty jumysyn bastaıdy. Bolashaqta aımaqtyq ekonomıkanyń tiregine aınalýy tıis taý-ken metallýrgııa ónerkásibi damýda. Bul jetistikterdiń barlyǵyna Elbasynyń sarabdal saıasaty men kúsh-jigeriniń, halqymyzdyń birligi men yntymaǵynyń arqasynda qol jetkizdik,- dep atap ótti Q.Kósherbaev.
Jıynda Tuńǵysh Prezıdent Nursultan Ábishuly Nazarbaevtyń eren eńbegi erekshe atap ótildi. Soltústik Aral arnasynyń qaıta qalpyna kelýi, «Baıqońyr» ǵarysh aılaǵynyń damýy, aımaqtaǵy ýran jáne munaıgaz ónerkásibiniń qurylýy, kúrdeli áleýmettik máselelerdiń sheshilýi, Syr óńiriniń kólik-logıstıkalyq áleýetin qalyptastyrý, sondaı-aq qazaq halqynyń rýhanı muralarynyń jańǵyrýy Elbasynyń aıryqsha eńbegi retinde atap ótildi.
Saltanatty sharanyń sońy belgili oryndaýshylar men shyǵarmashylyq ujymdardyń qatysýymen ótken merekelik konsertpen qorytyndylandy.