Táýelsiz elimizdiń jigerli, bilimdi jastaryn tárbıeleý – ustazdardyń basty paryzy. Ustazdar qaýymy bul oraıda ózderine júktelgen mindetti abyroımen atqaryp júr.
Men Beıneý polıtehnıkalyq kolledjinde 2004 jyldan beri jumys jasap kelemin. Jas býynǵa tehnıkalyq mamandyqtar boıynsha tek bilim berip qana qoımaı, olardyń kolledj qabyrǵasynda júrip-aq tájirıbe jınap, mamandyǵyna qatysty quraldarmen erte bastan shuǵyldanǵany jón dep esepteımin jáne mundaı múmkindiktiń jastardyń óz mamandyǵyn tezirek meńgerip ketýine berer áseri kóp.
Memleket basshysy N.Nazarbaevtyń «Qazirgi zamanda jastarǵa aqparattyq tehnologııamen baılanysty álemdik standartqa saı múddeli jańa bilim berý óte qajet», degen tapsyrmasyn ózim sabaq beretin «Esepteý tehnıkasy jáne baǵdarlamalyq qamtamasyzdandyrý» mamandyǵynda turaqty negizge alyp kelemin.
Bilim berý – kúrdeli is. Aqparattyq tehnologııa zamanynda jastardy qarapaıym sabaq berý ádis-tásilderimen qyzyqtyrý múmkin emes. Sondyqtan, bilikti mamandardyń is-tájirıbesine súıene otyryp jáne ony odan ári damyta eńbek etý qajet. Bul ustazdan jan-jaqtylyqty, talmaı izdenýdi talap etedi. Ásirese, aýyldyq jerlerdegi bilim berý uıymdarynyń jaǵdaıy ustazǵa júkteler mindettiń salmaǵyn eki eseleı túsedi. Qolda bardy uqsatyp, joqtan bar jasap jumys isteý kerektigin uǵyndyq. Osy oımen 2006 jyldan bastap úsh kýrsta oqytylatyn barlyq málimetter jınaqtalǵan elektrondy oqýlyqtar qurastyryp shyǵardyq, qazir ol oqýlyqtar kolledj stýdentterine qyzmet etýde. Kolledjde ǵımaratty baqylaýǵa, muǵalimderge vırtýaldy túrde sabaqtarǵa qatysyp ózara tájirıbe almasýy úshin beınekameralar ornalastyrdyq.
Shalǵaı aýyldarda jastardy óndiris oryndaryna turaqty aparyp, óndiris alańdarynda qural-jabdyqtarmen jumys jasatý múmkindigi shekteýli, ári óndiristik qaýipsizdik máselesi turǵysynan qoıylatyn talaptar da isti júzege asyrýǵa ońtaıly bola bermeıdi. Sondyqtan óndiristik jabdyqtardyń qoljetimdiligin arttyrý maqsatynda kolledj qabyrǵasynda «Beyneu Software» atty shyǵarmashylyq top quryp, sımýlıator-trenajıorlar jasaýdy qolǵa aldyq. Nátıjesinde, «Munaı jáne gaz isi», «Avtokólik qurylysy» mamandyqtary boıynsha mýltımedıalyq elektrondy oqýlyq jasap shyqtyq jáne «Teplovoz mashınısi», «Munaı jáne gaz ken oryndaryn paıdalaný» jáne «Munaıdy qaıta óńdeý tehnologııasy» mamandyqtaryna arnalǵan oqý-jattyǵý sımýlıator-trenajerlar daıyndap shyǵardyq. Shaǵyn maketterdi paıdalanyp bilim alǵan oqýshylarymyz Mańǵystaý oblysynyń bilim berýdi aqparattandyrý oqý-ádistemelik ortalyǵynyń «Eń úzdik veb-saıt» baıqaýynyń birneshe dúrkin jeńimpazdary atandy.
Kolledjimizde Beıneý aýdanyn sýlandyrý maqsatynda salynyp jatqan sý tundyrý stansasyna qajetti mamandar qysqa merzimdi kýrstarda bilim alýda. Oqý jylynyń sońyna deıin sý mamandaryna arnalǵan ınteraktıvti maket daıyndaýdy maqsat ettik. Is-tájirıbemiz oblys kóleminde taratylyp, biz daıyndaǵan maketter birneshe kórmege qoıyldy.
Tájirıbe almasý, óz bilgenińdi ózgelermen bólisý, ózge áriptesterden úırený – muǵalimdik qyzmettiń eń basty sharty. Osy oraıda túrli deńgeıdegi semınarlarǵa qatysyp, tájirıbe almasyp kelemiz. 2012 jyly Germanııanyń Hameln qalasyndaǵy Oıgen Raıntesa jáne saýda-sattyq mektepterinde elimizdegi kásiptik jáne tehnıkalyq bilim salasyna dýaldy oqytý júıesin engizý maqsatynda uıymdastyrylǵan taǵlymdamadan óttim. Bilim berý salasyndaǵy jumysym eleýsiz qalǵan joq. Oblystyq, respýblıkalyq dárejedegi túrli marapattarǵa qol jetkizip, bıyl Bilim jáne ǵylym mınıstrligi tarapynan «Úzdik pedagog-2016» júldesine ıe boldym.
Marapat alý da, ony tizbelep aıtý da maqsat emes, erinbeı eńbek etseń, ony eleıtin eliń bar ekendigin aıtý – maqsat. Ustazdyq qyzmettiń qyzyǵy men qıyndyǵyn qatar kóterip, elimizdiń erteńin daıyndaý jolynda izdenispen eńbek ete beretin bolamyz.
Turlan OSPANOV,
Beıneý polıtehnıkalyq kolledjiniń
joǵary sanatty arnaıy pán muǵalimi
Mańǵystaý oblysy,
Beıneý aýdany