Jurtshylyq Manash Qozybaev atyndaǵy Soltústik Qazaqstan memlekettik ýnıversıtetinde Elbasy jaıly tyń maǵlumattarmen jan-jaqty tanysa alady. «Uly Dala – Táýelsizdiktiń 25 negizi» juldyzdy 25 kún aksııasy aıasynda munda Tuńǵysh Prezıdent zaly esigin aıqara ashty.
Professor-oqytýshylar, stýdent-jastar, ardagerler ókilderi qatysqan saltanatty sharada joǵary oqý ornynyń prorektory Múkaram Taıjanova Memleket basshynyń ómirine, memlekettik qyzmetine qatysty tanymdyq derekter molynan qamtylǵanyn jetkizdi. Kitaphana dırektory Bátıma Jámenovanyń aıtýynsha, zalda Táýelsizdigimizden syr shertetin tarıhı qujattar, Elbasynyń Qyzyljar óńirine kelgen saparlarynan túsirilgen derekti fılmder, esten ketpes qyzǵylyqty kezdesýler jınaqtalǵan. Ýnıversıtettiń jeke qorynan alynǵan materıaldar arasynda túrli sýretterden qurastyrylǵan albomnyń orny bólek. Budan tysqary derekti fılmderdi teledıdar arqyly tamashalaýǵa da múmkindik týdyrylǵan.
Jıyn barysynda Tuńǵysh Prezıdent qorynyń stıpendıattaryna sertıfıkattar tabys etildi. Mundaı mártebege on stýdent ıe boldy. Solardyń biri Nııazbek Úkenov aqparattyq tehnologııalar fakýltetiniń tórtinshi kýrsynda oqıdy. Oqý ozaty qoǵamdyq jumystarǵa belsene qatysady. Prezıdent aqysynan bólek shákirtaqy da alady. Onyń armany – jaqsy maman bolý.
О́mir ESQALI,
«Egemen Qazaqstan»
Soltústik Qazaqstan oblysy