Parlament Senatynyń Tóraǵasy Qasym-Jomart Toqaev «Parlamentshiler ıadrolyq qarýdy taratpaý jáne joıý jolynda» (PNND) halyqaralyq uıymynyń jahandyq úılestirýshisi Alan Vareni qabyldady, dep habarlady Parlament Senatynyń baspasóz qyzmeti.
Tóraǵa «Iаdrolyq qarýsyz álem qurý» halyqaralyq konferensııasyn tabysty ótkizýge qosqan qomaqty úlesi úshin parlamenttik uıymǵa alǵys aıtty. Semeı ıadrolyq polıgony jabylýynyń 25 jyldyǵyna arnalǵan forým bıylǵy 29 tamyzda Astanada ótken bolatyn.
A.Vare tamyz konferensııasynyń qatysýshylary qabyldaǵan «Astana kózqarasy: radıoaktıvti túnekten ıadrolyq qarýsyz álemge qadam» deklarasııasyn BUU jáne basqa halyqaralyq uıymdarda tanystyrylǵany týraly habardar etti. Úılestirýshiniń aıtýynsha, halyqaralyq qoǵamdastyq qarýsyzdaný jáne ony taratpaý salasyndaǵy Qazaqstan Prezıdenti Nursultan Nazarbaevtyń kóshbasshylyǵy men syndarly usynystaryn atap ótýde. PNND Qazaqstannyń, onyń ishinde elimizdiń BUU Qaýipsizdik Keńesine múshe bolǵan kezeńdegi saıasatyn jan-jaqty qoldaýdy jalǵastyra berýge nıettenip otyr.