Almatynyń «Qaırat» fýtbol komandasynda óner kórsetetin Andreı Arshavın «Rossııa 24» telearnasynyń «Fýtbol Rossıı» baǵdarlamasyna bergen suhbatynda qazaqstandyq klýbpen qalaı kelisimshartqa otyrǵanyn, komandasynyń ne sebepti Premer-lıga men Qazaqstan kýbogynda jeńilgenin, sondaı-aq óz otanyna qashan oralatyny týraly áńgimelep berdi. Bul týraly vesti.kz habarlady.
Qazaqstan kýbogynyń fınaly kezindegi aýa raıy yńǵaısyzdyq týdyrǵany kópshilikke belgili. Bul jóninde ol: «Japalaqtap jaýǵan qar áserin tıgizbeı qoımady. О́z basym matchtyń keıinge shegerilgenin qalamas edim. Onyń ústine sportqa qatysty emes sebepteri de boldy. Fýtbol bolǵandyqtan, oıynshylar qandaı jaǵdaıǵa bolmasyn daıyn bolýy kerek. Bul matchta bizdiń josparymyz iske asqanmen, sońyna taman belsendiligimiz baıaýlap qaldy. Al «Astana» óz múmkindigin paıdalanyp, jeńisti goldy soǵyp ketti. Astanalyqtar Eýropa arenalarynda óner kórsetip, ysylǵan, strategııalary da birizdilikke qoıylǵan. Qateligimizdi tıimdi paıdalana bildi. Osydan keıin mundaı alańda óner kórsetý ońaıǵa tústi. Meniń oıymsha, olar tájirıbesiniń moldyǵynan bizdi utyp ketti», – dedi Arshavın.
Almatyda mundaı aýa raıyn eshkim kútpegen bolar degen suraqqa: «Almaty qalasynyń aýa raıy óte qolaıly. Biraq qyrsyq shalǵanda Kýbok sarapqa salynatyn kúni kútpegen jerden kún raıy buzyldy. Tabıǵattyń tosyn syıyna qarsy qandaı shara bar?" dep jaýap berdi. Sonymen qatar soltústiktiń adamyna kúnniń ystyǵy qanshalyqty qıyndyq týdyrýy múmkin ekendigine de toqtaldy. «Keıde ózim de tań qalamyn. Aýa temperatýrasy kúndiz ben keshqurym ýaqytta on gradýsqa deıin ózgeredi. Mysaly, Krasnodarda túske taman 30 gradýs bolsa, kún batqannan keıin de sol kórsetkishti kórsetip turady. Oıyndarymyz keshke taman ótetindikten bizge óte qolaıly», – dedi jartylaı qorǵaýshy.
Almatynyń stadıony elimizdegi eń úzdik alańdardyń biri ekeni sózsiz. Bul týraly ol: «Iá, ol jaǵy ras. Tek Respýblıka aımaǵynda ǵana emes, kóptegen elderdiń stadıondarynan jaqsy dep oılaımyn», – dedi.
Arshavın aǵylshynnyń áıgili «Arsenalynda» óner kórsetip, dúıim jurttyń ystyq yqylasyna bólengennen keıin ózi túlep ushqan «Zenıtke» qaıta oralǵan. Alaıda, jasy kelip, burynǵy deńgeıinde oınaı almaǵandyqtan «Kýban» ujymyna aýysqan bolatyn. Munda da joly bola qoımady. Bul jóninde ol: «Anglııadan keıin ózge elge qonys aýdarǵym kelmedi. Al Qazaqstannyń jóni múldem bólek. Almatyda bári orys tilin biletindikten, esh qıyndyq kórmedim», – dedi «Qaırat» oıynshysy.
«Qaırat» pen «Astana» arasyndaǵy fınaldyq kezdesýge qaıta oralsaq. Esterińizde bolsa, Reseı quramasynyń burynǵy kapıtany alǵashqy taımda jartylaı qorǵanysta oınaǵan bolsa, ekinshi 45 mınýtta shabýyl shebinde ónerin pash etti. Bul jóninde ol: «Men «Zenıtte» de, «Arsenalda» da dál osylaı oınadym. Sol qaptalda shabýylǵa jıi aralasyp júrdim. Munda da bári sol qalpynda. Aıtarlyqtaı rólim ózgergen joq», – dedi.
Qazaqstan chempıonatynda «Qaırat» pen «Astanaǵa» básekelestik týdyra alatyn komanda bar ma degen suraqqa: «Men kelgenge deıin «Aqtóbe» eń úzdik komanda bolatyn. Menińshe, Qazaqstan fýtbolynyń jarqyn belesteriniń dál osy komandamen tikeleı baılanysy bar. Biraq qazir bári basqasha. Olardyń jaǵdaıy azdap qıyndaý. «Astana» men «Qaıratqa» báseke bola alatyn ujym... Eger kestege kóz júgirter bolsaq, ekinshi jáne úshinshi oryndaǵy komandalardy 23 upaı bólip tur. Osydan-aq kóp nárseni túısinýge bolady», – dedi Reseı quramasynyń burynǵy kapıtany.
«Astana» bıyl ishki birinshilikti de, el Kýbogyn da jeńip aldy. Arshavın «Qaırattyń» mundaı jetistikke qol jetkizýine ne kedergi bolýy múmkin ekenine de toqtaldy: «Bárimizge belgili. Biz maýsymnyń basyn óte sátsiz bastadyq. О́kinishke qaraı, elordalyqtar qýyp jetýge múmkindik bermedi. Jyl sońyna deıin bárin jospar boıynsha oryndap, birinshi keldi», – dedi.
Reseılik aıaqdopshy Almatynyń klýbymen kelisimshart merzimin 2017 jylǵa deıin uzartqan bolatyn. Bul týraly ol: «Eger zańdy turǵydan aıtar bolsaq, merzimim o basta eki jylǵa kelisilgen. Biraq osyǵan deıin aıtqanymdaı, klýb basshylyǵy qalaǵan ýaqytynda meniń qyzmetimnen bas tarta alady. «Qaırattyń» prezıdenti bir sózinde transfer ýaqytynda meni aýystyryp jiberýge quqyly ekenin aıtqan bolatyn. Negizi buǵan meniń eshqandaı qarsylyǵym joq. Degenmen, birneshe apta buryn ol kisi habarlasyp, oıynyma kóńili tolatynyn, kelisimshart ózgerissiz, sol qalpynda qalatynyn aıtty. Al ózimniń qalaýym belgili. Bári yńǵaıly bolǵandyqtan, ázirge ketkim kelmeıdi», – dedi.
Fýtbolshynyń jasy 30-dan asqannan keıin fızıkalyq turǵydan burynǵydaı óner kórsete almaıtyny belgili. Bul jóninde ol: «Qazir maǵan eshnárse qıyndyq týdyrmaıdy. Jattyǵý alańyna baryp, dop tepken, jankúıerler aldynda bar qabiletimdi kórsetken unaıdy. Ortalyq stadıonda ótetin matchtardyń jóni tipten bólek, 90 paıyz utatynyńdy bilip, erekshe bir rahatqa bólenesiń», – dedi ol.
Al 25 pen 35 jas arasyndaǵy jattyǵýlarda qanshalyqty ózgeris bar degen suraqqa: «Bul jerde bári bapkerdiń sheshimine tikeleı baılanysty ǵoı. 25 jasymda deısiz be? 2006 jyl... Dık Advokattyń kezi bolatyn. Menińshe, esh ózgeris joq sııaqty. Sol kezdegideı jattyǵýlar, kóptegen matchtar...», – dedi ol.
Telearnaǵa bergen suhbat barysynda ol Reseı chempıonaty jaıly da aıtyp ótti: «RFPL oıyndaryn jibermeı kóretin kezderim bolady. Al keıde oǵan ýaqytym jetpeıdi. Aıta keterim, chempıonattyń deńgeıi burynǵydaı emes. Bunyń basty sebebi, komandalardyń bıýdjeti quldyraǵannan dep oılaımyn. Sondaı-aq ulttyq quramanyń da dárejesi tómendep qaldy. Nashar oıyn kórsetkennen keıin qatań synǵa alatyndardyń qarasy kún sanap artyp barady. Dáýreni júrgen 2008 jyldyń jaqyn aralyqta oralatynyna kúmánim bar. Mundaı oıynymen Eýropa nemese álem chempıonatynyń jartylaı fınalynda oınaıdy degenge asa qatty senbeımin. Reseıge oralý jaǵyna keler bolsaq, eger qalaǵanymda «Kýban» ujymynan eshqaıda ketpes edim. Onyń ústine ishki birinshiliktegi ekinshi segizdikte oınaıtyn klýbtarǵa aýysqym kelmeıdi», – dedi «Qaırattyń» 28 nómirli oıynshysy.