Mereıtoılyq H Halyqaralyq P.Chaıkovskıı atyndaǵy jasóspirimder baıqaýy Astana qalasynda 2017 jyldyń 15 men 25 maýsymy aralyǵynda ótedi. Bul týraly Ortalyq kommýnıkasııalar qyzmetinde QazUО́Ý rektory Aıman Musaqojaeva men P.I. Chaıkovskıı atyndaǵy Halyqaralyq konkýrs laýreattar qaýymdastyǵynyń bas dırektory Andreı Sherbaktyń qatysýymen ótken baspasóz máslıhatynda belgili boldy.
Professor Aıman Musaqojaeva atap ótkendeı, baıqaý 17 jasqa deıingi mýzykanttar arasynda fortepıano, skrıpka jáne vıolonchel mamandyqtary boıynsha ótkiziledi. «Baıqaýdy Mádenıet jáne sport mınıstrligi, Qazaq Ulttyq óner ýnıversıteti men P.I.Chaıkovskıı atyndaǵy Halyqaralyq baıqaý laýreattary qaýymdastyǵy uıymdastyrady. Ol P.I.Chaıkovskıı atyndaǵy Máskeý memlekettik konservatorııasy, Máskeý úkimetiniń jáne Astana qalasy ákimdiginiń qoldaýymen ótkiziledi, – dedi KazUО́Ý rektory.
Onyń aıtýynsha, baıqaýdyń ereksheligi – ol ártúrli elderde ótkiziledi ári jas mýzykanttardyń álemniń barlyq elderinen qatysýyna múmkindik beredi.
H Halyqaralyq P.Chaıkovskıı atyndaǵy jasóspirimder baıqaýynyń tóreshileri quramyna Reseı, Qazaqstan, AQSh, Koreıa, Qytaı, Fransııa, Shveısarııa elderiniń belgili mýzykanttary kiredi. Baıqaýdyń birinshi jáne ekinshi kezeńderi Qazaq Ulttyq óner ýnıversıtetiniń sahnalarynda, úshinshi kezeń – «Astana Opera» Opera jáne balet teatrynyń sahnasynda, al ashylý jáne jabylý saltanaty «Qazaqstan» Ortalyq konsert zalynda ótedi. Baıqaýdyń fınalyna qatysýshylar sımfonııalyq orkestrlerdiń súıemeldeýimen shyǵarma oryndaıdy.
1992 jyly negizi qalanǵan Halyqaralyq P.I.Chaıkovskıı atyndaǵy jasóspirimder baıqaýy – jas pıanıster, skrıpkashylar jáne vıolonchelıster úshin asa iri kásibı konkýrs. Ol osyǵan deıin Máskeý, Sankt-Peterbýrg, Novosibir (Reseı), Sendaı (Japonııa), Sývon (Koreı Respýblıkasy), Sıamyn (QHR), Montre-Veve (Shveısarııa), Kýrasıkı (Japonııa) qalalarynda ótken bolatyn.
Dastan KENJALIN, «Egemen Qazaqstan».