Qazaqstan men Izraıl arasyndaǵy kelisim nátıjesinde alǵashqy zaýyt qurylysy bastalady. Bul týraly búgin Astanada Qazaqstan - Izraıl bıznes-forýmynda Qazaqstan-Izraıl Bılateraldi saýda-ónerkásip palatasynyń tóraǵasy Mıhael Roe málimdedi.
«Zaýyttan shyǵatyn barlyq ónim Qytaıǵa eksporttalady. Odan túsetin paıda – 10 mıllıon dollar. Almaty oblysynda salynatyn zaýyttyń qurylysyna Izraıldiń tehnologııasy, Qazaqstannyń shıkizaty qoldanylady. Kásiporynǵa tartylatyn ınvestısııany qos eldiń kásipkerleri moınyna aldy. Bes jylǵa Qytaıdan tapsyrys bar. Kásiporyn azyq-túlik ónimderin shyǵarady», dedi ol. M.Roe nysannyń Qytaı Qazaqstanǵa qus etin eksporttaýǵa qaıta ruqsat bergennen keıin, ıaǵnı 10-12 aıdan soń resmı túrde ashylatyndyǵyn atap ótti. Zaýyt quny 5 mıllıon dollardy quraıdy. Al zaýyttan shyǵatyn ónimniń eksporttyq quny 10-15 mıllıon dollar bolady dep kútilýde.
Zaýyttyń qurylysy jónindegi memorandýmǵa «BAZIS-A» JShS men «BAL International LTD» kompanııasy qol qoıdy.
Sońǵy derekterge sáıkes, elimizde ızraıldik seriktestermen birigip aqparattyq-kommýnıkasııalyq tehnologııalar salasynda jalpy somasy 86,5 mln AQSh dollaryna 7 jańa joba iske qosylǵan. Olar – elektrondy qurylǵylarǵa arnalǵan baspa platalaryn óndirý, «Bank Hapoalim» kommersııalyq uıymynyń qurylýy, Almaty oblysynda jáne Astana qalasynda jylyjaı keshenderiniń, Soltústik Qazaqstan oblysynda broıler qus fabrıkasynyń, Mańǵystaý oblysynda teńiz sýyn tushytý qondyrǵysynyń qurylystary. Al qazirgi tańda qazaqstandyq-ızraıldik kásipkerler medısınalyq saqtandyrý jelisin jáne «Arhımedes Qazaqstan» medısınalyq ortalyqtar jelisin qurý jobasyn iske asyrýda.
Qazaqstanda ızraıldik kapıtaldyń qatysýymen 254 kásiporyn tirkelgen. Onyń 112-si jumys isteýde.
Ashat RAIQUL, "Egemen Qazaqstan".