Táýelsizdiktiń 25 jyldyǵy qarsańynda Aqtaýdaǵy "QazAzot" mekemesinde qýattylyǵy 40 megavattyq gazdy-porshendi elektr stansasy iske qosyldy.
Elimizdegi eń iri hımııalyq ónerkásip bolyp tabylatyn «QazAzot» munaı jáne agroónerkásip salasyn mıneraldy tyńaıtqyshtarmen qamtamasyz etip keledi. Indýstrıaldy-ınnovasııalyq damý baǵdarlamasy aıasynda júzege asqan jańa joba buǵan deıin tok kózin monopolıst mekemeden alyp kelgen kásiporynnyń ózgege táýeldiligin joıyp, jumys qýattylyǵyn arttyrady dep kútiledi. Qurylys jumystaryn belgilengen merzimde aıaqtaǵan reseılik «Zvezda-energetıka» AQ-nyń bas dıerektory A.Andreev qýattylyǵy men tehnıkalyq jaǵynan tolyq qamtylǵan jobanyń zamanaýı standarttarǵa saı ekendigin aıtady.
«QazAzotta» sońǵy jyldary jańǵyrtý jumystary qarqyndy júrgizilýde. Bes jyl buryn Indýstrııalandyrý kartasyna enip, jumystaryn jańǵyrtqan zaýytta jańa jobanyń iske qosylýy jumys qarqyndylyǵyn arttyryp jáne jańa jumys kózderin ashýǵa múmkindik beredi.
Gúlaıym ShYNTEMIRQYZY, «Egemen Qazaqstan».