Memleket basshysy Izraıl memleketiniń Premer-mınıstri Bınıamın Netanıahýmen ótken kelissózder qorytyndysy boıynsha BAQ ókilderi úshin baspasóz brıfıngin ótkizdi, dep habarlaıdy Aqorda.
"Biz ekijaqty ózara is-qımyldyń keshendi máselelerin talqylap, halyqaralyq ózekti problemalar jóninde pikir almastyq. Kezdesý qorytyndysyna sáıkes, Qazaqstan men Izraıldiń kóptegen aýqymdy máseleler jóninde ózara tıimdi is-qımyl jasaı alatynyn tolyq senimmen aıtýǵa bolady," – dedi Qazaqstan Prezıdenti.
Nursultan Nazarbaev pen Bınıamın Netanıahý saýda-ekonomıka máselelerine aıryqsha nazar aýdaryp, jahandyq naryqtyń jalpy saýda aınalymyndaǵy tıimsiz ahýaldyń keri áserin atap ótti. Osyǵan baılanysty, taraptar ózara ekonomıkalyq is-qımyldy jandandyrý úshin qandaı múmkindikterdi paıdalaný qajet ekenin talqylady.
"Elderimiz arasyndaǵy tikeleı áýe qatynasyn qalypqa keltirý jáne vızasyz rejimdi engizý máselesin pysyqtaý jónindegi ýaǵdalastyqqa qol jetkizildi. Mundaı sharalar bıznes salasyndaǵy ekijaqty baılanystar men týrızm salasyndaǵy yntymaqtastyqty nyǵaıtýǵa septigin tıgizýge tıis," – dedi Memleket basshysy.
Qazaqstan Prezıdenti Eýrazııalyq ekonomıkalyq odaq pen Izraıl arasynda erkin saýda aımaǵyn qurý eki eldiń iskerlik baılanystaryn damytýǵa eleýli yqpal etetinin jáne qazir bul jóninde naqty kelissózder júrgizilip jatqanyn atap ótti.
"Búgin halyqaralyq jáne óńirlik máseleler jóninde de qyzý ári ashyq pikir almastyq. Birikken Ulttar Uıymy, Azııadaǵy ózara is-qımyl jáne senim sharalary jónindegi keńes jáne basqa da kóptarapty uıymdar men forýmdar ózara is-qımylymyzdyń mańyzdy orny retinde qarastyryldy," – dedi Nursultan Nazarbaev.
Memleket basshysy kezdesý qorytyndysy boıynsha taraptardyń saıası dıalogty udaıy qoldaý, baılanystardy barlyq deńgeıde damytý, sondaı-aq seriktestikti jańa sapaly deńgeıge kóterý úshin birlese kúsh-jiger jumsaý jóninde kelisimge kelgenin málimdedi.
"Ýaǵdalastyqtardyń qarqyndy túrde iske asýy búgin biz talqylaǵan barlyq baǵyt boıynsha ekijaqty ózara is-qımyldy odan ári damytýǵa yqpal etedi dep senemin," – dedi Qazaqstan Prezıdenti.
Baspasóz brıfınginiń sońynda Nursultan Nazarbaev dostas Izraıl halqyn aldaǵy kele jatqan Hanýka merekesimen quttyqtady.