Ulttyq akademııalyq kitaphanada Qazaqstan halqy Assambleıasynyń qoldaýymen, pýblısıst, QHA jáne Qazaqstan Jazýshylar odaǵynyń múshesi Aleksandr Tarakovtyń el Táýelsizdiginiń 25 jyldyǵyna arnalǵan «Kazahstanskıı harakter» kitabynyń tusaýkeser rásimi ótti.
Bul kitapqa avtordyń belgili tulǵalar týraly 20 shaqty ocherki engen. Ocherkterinde A.Tarakov ómirdiń qıyn jaǵdaılary men kúrdeli synaqtaryna tótep berip qana qoımaı, kásibı sheberliktiń shyńyna shyǵyp, úlken nátıjelerge qol jetkizgen qaısar adamdardyń minez-qulyqtaryn jan-jaqty ashyp kórsetken.
«Bul arnaıy jazylyp, jaryqqa shyqqan kitap emes. Ol – uzaq jylǵy eńbektiń nátıjesi. Kitapta jazylǵan dúnıeler, ondaǵy keıipkerler – Táýelsizdiktiń jemisi. Sebebi, men mundaǵy keıipkerlerdiń ósý, tulǵaǵa aınalý joldaryn jan-jaqty ári tereń baqylap, zerdeleýge tyrystym. Jalpy alǵanda, qazaqstandyqtardyń kúsh-jigeri men minez-qulyqtary aıryqsha. Men qalam terbegen bul azamattardyń árqaısysynyń ómir joly jaqsy qalyptasty, sebebi, olar tek alǵa jyljý arqyly bıik ári jańa shyńdardy baǵyndyra bildi», – dedi avtordyń ózi.
Parlament Májilisiniń depýtaty Saýytbek Abdrahmanov: «Men bir joly tusaýkeser men konferensııa bir-birinen nesimen erekshelenedi degen saýalǵa qatysty óz oıymdy bildirgen edim. Konferensııada belgili bir oqylǵan kitap týraly qundy oı aıtylady, al tusaýkeserde kitapty oqymaı turyp, oǵan maqtaý sóz, jaqsy pikir bildiriledi. Biraq, búgingi jaǵdaı múldem olaı emes. Sebebi, bárimiz de osy eńbekte jazylǵan dúnıelerdi oqyp shyqqanbyz. Olardyń barlyǵy «Kazahstanskaıa pravda» gazetiniń betinde jaryq kórdi. Bárimiz de bul basylymnyń oqyrmandarymyz. Bárimiz de Aleksandr Tarakovtyń shyǵarmashylyǵymen jaqsy, etene tanyspyz. Bul kitap óz ýaqytynda jaryq kórip otyr. Sebebi, Prezıdent Nursultan Nazarbaev aldymyzǵa Jalpyǵa Ortaq Eńbek Qoǵamyn qurý týraly mindet qoıyp otyr. Al bul – eńbek jáne eńbek adamy týraly kitap jáne óte jaqsy kitap», – dedi.
Atalǵan eńbek týraly pikirin Qazaqstan halqy Assambleıasy kafedralary assosıasııasynyń tóraǵasy, ekonomıka ǵylymdarynyń doktory Anatolıı Bashmakov ta bildirdi. «Kez kelgen eńbektiń oqyrmanǵa jol tartýy – árqashan da aıtýly oqıǵa. Al maǵynaly da mazmundy eńbektiń jaryq kórýi – ol mereke. Jaqsy kitap – bul jaı ǵana ónim emes, ol naǵyz azamattyq is-áreket. Aleksandr Tarakovtyń bul dúnıesinde onyń eń tańdaýly oı-paıymdary, ádebı sýrettemeleri men beıneleri, keıipkerlerdiń ómirindegi keıbir sátter sátti kórinis tapqan», – dedi ol.
Al «Qoǵamdyq kelisim» respýblıkalyq memlekettik birlestiginiń jetekshisi Natalıa Kalashnıkova: «Búgin biz bul kitapty Ulttyq akademııalyq kitaphanaǵa, sondaı-aq, ultaralyq jáne konfessııaaralyq qatynastar salasy boıynsha qazaqstandyq avtorlardyń ǵylymı eńbekteri men zertteýleriniń qoryn qalyptastyrý jáne nasıhattaý maqsatynda qurylǵan Qazaqstan halqy Assambleıasy depozııtarııine resmı túrde tapsyratyn bolamyz. Jalpy alǵanda, bul shyǵarma álemniń 80-nen astam eliniń 130 myńǵa tarta oqyrmanynan turatyn aýdıtorııany qamtıtyn bolady», – dedi óz sózinde.
Sonymen qatar, Qazaqstan halqy Assambleıasy Tóraǵasynyń orynbasary Eraly Toǵjanov QHA-nyń birqatar múshesin, etnomádenı birlestikter, ǵylymı jáne shyǵarmashylyq zııaly qaýym ókilderin Qazaqstan Respýblıkasynyń memlekettik nagradalarymen, «Qazaqstan Respýblıkasy Táýelsizdigine – 25 jyl» merekelik medalimen, QHA-nyń «Birlik» altyn medalimen, QHA-nyń Qurmet gramotasymen jáne Alǵys hatymen marapattady.
Máselen, Iаdrolyq synaqtarǵa qarsy «Nevada-Semeı» halyqaralyq qozǵalysynyń vıse-prezıdenti Sultan Kartoev pen Batys Qazaqstan oblysy Qazaqstan halqy Assambleıasy hatshylyǵynyń meńgerýshisi Gaısa Kapakov «Parasat» ordenimen, Qazaqstan Respýblıkasy Ulttyq mýzeıiniń aǵa ǵylymı qyzmetkeri Vıktor Zaıbert II dárejeli «Dostyq» ordenimen, Oral qalalyq máslıhatynyń depýtaty, QHA múshesi Avetık Amırhanıan, «Dınar-Elektromash» JShS meńgerýshisi Sergeı Vıshnıak jáne Almaty qalasyndaǵy ázerbaıjan etnomádenı birlestiginiń tóraǵasy Eıbaz Mamedgasanov «Qurmet» ordenimen marapattaldy.
«Eren eńbegi úshin» medalin «Esik» memlekettik tarıhı-mádenı qoryq-mýzeıiniń dırektory Gúlmıra Muhtarova alsa, Jambyl atyndaǵy Qazaq memlekettik fılarmonııasynyń memlekettik úrlemeli aspaptar orkestriniń solısi Igor Blagodarnyı «Qazaqstannyń eńbek sińirgen qaıratkeri» qurmetti ataǵyna ıe boldy.
Láıla EDILQYZY,
«Egemen Qazaqstan»