Batys Qazaqstan oblysy Qaztalov aýdanynda kásipker Nurlybaı Joldybaev «Jyl mesenaty» atandy, dep habarlaıdy QazAqparat.
Aýdan ákimi Nurlan Bekqaıyrdyń aıtýynsha, N.Joldybaev Táýelsizdiktiń torqaly toıyna oraı týǵan jeri Taldyapan aýyldyq okrýgine qarasty Saryqudyq eldi mekeninde óz qarajaty esebinen 5,2 mln teńgege medpýnkt salyp bergen. Jýyrda ashylǵan medpýnktte feldsherlik jáne akýsherlik kabınet, ekpe bólmesi jańa apparattarmen qamtamasyz etilgen. Endi aýyl turǵyndary alysqa barmaı-aq osynda emdele alady. Bir aıta keterligi, kásipker atalmysh ǵımaratty memleket ıeligine eshqandaı qaıtarymsyz berip otyr.
«Oblys kóleminde kásipkerdiń óz aýylyna osylaısha jańa ǵımarat salyp berýi birinshi ret deýge bolady. Onyń bul isi úlgi etýge turarlyq. Jalpy, aýdanda kásipkerlerdiń óz aýyldaryna qolushyn berýi bir bul emes, mundaı jaqsy úrdis aldaǵy ýaqytta da jalǵasyn taba bermek», – dedi aýdan ákimi Nurlan Bekqaıyr.