Astana qalasynyń Memlekettik muraǵatynda el Táýelsizdiginiń 25 jyldyǵyna arnalǵan «Táýelsizdik jyldaryndaǵy 25 ıgi is» kórmesi ashyldy, dep habarlaıdy Qazaqparat.
Ekspozısııany Qazaqstan Respýblıkasy Prezıdentiniń muraǵaty men Astananyń Memlekettik muraǵaty birlesip daıyndady. Kórme aıasynda Táýelsizdik jyldary ekonomıka men qoǵamǵa eleýli ózgerister ákelgen, halyqtyń ál-aýqatyn jaqsartqan memlekettiń 25 negizgi salalyq baǵdarlamalary jaıly aqparat keltirilgen.
Astana qalasynyń mádenıet, muraǵattar jáne qujattama basqarmasynyń habarlaýynsha, kórme 200-den astam materıaldy qamtıdy. Olardyń basym bóligin 1991 jylǵy 10 jeltoqsandaǵy N.Á. Nazarbaevtyń Prezıdent qyzmetine kirisýine arnalǵan QR Joǵarǵy Keńesi saltanatty otyrysynyń stenogrammasy, 1991 jylǵy 16 jeltoqsandaǵy «Qazaqstan Respýblıkasynyń memlekettik táýelsizdigi týraly» QR Konstıtýsııalyq zańy, 1991 jyly 21 jeltoqsanda bekitilgen TMD qurylýy týraly Almaty deklarasııasy, 1996 jyly 16 mamyrda tizilgen QR dıplomatııalyq qarym-qatynas ornatqan memleketter tizimi, «Aqmola qalasyn Qazaqstan Respýblıkasynyń astanasy dep jarııalaý týraly» Qazaqstan Respýblıkasy Prezıdentiniń Jarlyǵy, «Semeı ıadrolyq synaq polıgonyn jabý týraly» Jarlyq jáne ózge de mańyzdy saıası qujattar quraıdy.
Sonymen birge, kelýshiler nazaryna Semeı polıgonyndaǵy alǵashqy ıadrolyq synaq, Qazaqstanǵa tuńǵysh oralmandardyń kelýi syndy sırek fotosýretter, memlekettik baǵdarlamalardyń júzege asýy týraly ınfografıkalar usynyldy.
Astana Memlekettik muraǵatyndaǵy (Áýezov kóshesi, 3) kórme jeltoqsan aıynyń aıaǵyna deıin jalǵasady.