Túrkııa Qazaqstan, Ázerbaıjan jáne Qyrǵyzstanǵa ózara saýda operasııalarynda ulttyq valıýtamen eseptesýdi jandandyrýdy usyndy.
«Túrkııa ulttyq valıýtamen saýda jasaýǵa úlken mán beredi jáne eldiń saýda aınalymyndaǵy onyń úlesin 10 paıyzǵa jetkizýdi kózdeıdi», – dep málim etti sársenbide, Bakýde Túrkitildes elder yntymaqtastyǵy keńesine kiretin memleketterdiń ekonomıka mınıstrleriniń VI kezdesýinde Túrkııanyń ekonomıka mınıstri Nıhat Zeıbekchı, dep jazady «Interfaks-Ázirbaıjan».
Keńes quramyna Ázerbaıjan, Túrkııa, Qazaqstan jáne Qyrǵyzstan kiredi.
Nıhat Zeıbekchıdiń aıtýynsha, Túrkııanyń jyldyq saýda aınalymy 430 mlrd dollardy quraıdy, onyń tek 1 paıyzy ǵana keńes quramyna kiretin eldermen saýda-sattyqqa tıesili. «Jiberip alǵan qatelikterimizdi túzep, ózara saýdany jandandyrýymyz kerek», – dep málimdedi mınıstr.
Ol sondaı-aq elektrondy saýda salasynda yntymaqtastyqtyń mańyzdylyǵyn atap ótti. Sóz alǵan Qazaqstannyń ekonomıka mınıstriniń orynbasary Aıdar Áripbaev ınvestısııa, saýda, tranzıt salalarynda yntymaqtastyq perspektıvalarynyń bar ekenin málimdedi. Ol keńeske kiretin elderdiń ekonomıkalyq yntymaqtastyq baǵdarlamasyn ázirleýdi usyndy.