Reseıdiń kýrortty Sochı qalasynda shahmattan mektep oqýshylary arasynda álem chempıonaty bolyp ótti. Onda qazaqstandyq Merýert Kamalıdenova (sýrette) qola júldeger atandy.
Chempıonatqa álemniń 30 elinen 400-den astam jas sportshy qatysty. Ol 7, 9, 11, 13, 15 jáne 17 jastaǵy uldar men qyzdardy básekege túsirdi. Astana qalasynyń mektep oqýshysy Merýert Kamalıdenova 11 jastaǵy qyzdar arasynda synǵa tústi. Shveısar júıesimen 9 týrdan turatyn tártippen ótken dodada ol 6,5 upaı jınady. Al 7,5 upaıy bar úndistandyq P. Dhaıana – birinshi, 7 upaıly reseılik E. Nasyrova ekinshi oryndardy jeńip aldy.
Bizdiń jas zııatkerlerimiz arasynda márege Nazerke Nurǵalı (13 jas) – tórtinshi, Aıalym Qaldarova (9 jas) – besinshi, Ramazan Jalmahanov (15 jas) – altynshy, al Ádil Satybaldy (7 jas), Elena Slesarýk (17 jas) jáne Temirlan Safarǵalıev (17 jas) toǵyzynshy bolyp jetti.
Sochıdiń «Grand Otel Jemchýjına» meımanhanasynda qanat jaıǵan chempıonatta ózbekstandyq A.Hmadamova men mońǵolııalyq N.Sodbılegt (7 jas), ázerbaıjandyq S.Gasımova men reseılikter L.Lyssov (9 jas), I.Makoveev (11 jas), amerıkalyq N.Bashkanskı men ózbekstandyq N. Abdýsattorov (13 jas), úndistandyq A. Harshını men reseılikter O. Bykov (15 jas), A.Dmıtrıeva men túrikmenstandyq S.Atabaev (17 jas) top jardy.
Týrnırde barlyǵy 4 altyn, 6 kúmis jáne 3 qola medal jeńip alǵan Reseı quramasy birinshi orynǵa shyqty. Mundaı chempıonat álemde 2000 jyldan beri ótip keledi. Onda chempıon atanyp, júldegerler tuǵyrynan kóringen qazaqstandyq jas shahmatshylar az bolǵan joq.
Aıan ÁBDÝÁLI,
«Egemen Qazaqstan»
ASTANA