Oblys ortalyǵyndaǵy S.Toraıǵyrov atyndaǵy memlekettik ýnıversıtettiń «Foundation» fakýltetine bilim alýǵa 2014 jyldyń qazan aıynda 50 tyńdaýshy jas kelse, bıylǵy oqý jylynda daıarlyq bólimine 78 tyńdaýshy qabyldanypty. Al «Dúnıejúzi qazaqtary qaýymdastyǵy» respýblıkalyq qoǵamdyq birlestigi oblystyq fılıaly ótkizgen kezdesýde Qytaı, Mońǵolııa jáne О́zbekstannan kelgen stýdent jastar oqý bitirgen soń ata-babalarynyń qasıetti jerinde qalyp, qyzmet etip, urpaq ósirýdi maqsat etetinderin aıtty.
Jalpy, «Foundation» fakýlteti 2012 jyldyń qyrkúıeginde Bolon úderisiniń negizinde jańa formatta bilim berý baǵytynda quryldy. Fakýltet dekany Sáýle Kisembaevanyń aıtýynsha, basty ereksheligi – elimiz úshin básekege qabiletti mamandar daıarlaý, bilim alýshylardy daıyndyq kýrstary arqyly keshendi testileýge daıarlyqtaryn tereńdetý, sheteldik qazaq dıasporasynyń ókilderin, oralmandar men shetel azamattaryna tilderdi oqytý, qazaqstandyq bilimge beıimdeý.
2014 jyly bilim alǵan tyńdaýshylardyń 29-y elimizdiń joǵary oqý oryndaryna túsipti. Qazirgi kezde fakýltette sheteldik qazaq stýdentteri, kúndizgi daıyndyq kýrstaǵy tyńdaýshylar, qashyqtyqtan bilim alýshylar, bazalyq synyp oqýshylary, keshki daıyndyq kýrstardyń tyńdaýshylary bilim alady. Fakýltet Elbasynyń qoldaýymen «Shetelde turatyn otandastardy qoldaýdyń memlekettik baǵdarlamasy» aıasynda ashyldy. Baǵdarlama qazaq dıasporasy ókilderi men oralmandar úshin jalpy bilimniń daıyndyq deńgeıin arttyrý maqsatynda jáne olarǵa joǵary jáne orta kásiptik oqý oryndaryna túsýge qajetti jaǵdaıdy jasaý maqsatyn kózdeıdi.
Shetelden kelip bilim alǵysy keletin qazaq jastaryn baýyrmaldyqpen qarsy alyp, olardyń óz elinde ógeısimeı, ata-babalarynyń jerinen óz oryndaryn taýyp, atamekenderinde qalýlaryna S.Toraıǵyrov atyndaǵy ýnıversıtet pen «Dúnıejúzi qazaqtary qaýymdastyǵy» respýblıkalyq qoǵamdyq birlestiginiń oblystyq fılıaly erekshe qyzmet jasaýda.
Farıda BYQAI,
«Egemen Qazaqstan»
PAVLODAR