Jyl mezgilderiniń árqaısysynyń ózindik ereksheligi men qyzyǵy bar. Qyraýly qystyń qyzyǵy shańǵy teýip, muz aıdyndarynda konkımen syrǵanaý ekeni belgili. Oblys ortalyǵynda osyndaı buqaralyq sportty damytý úshin qandaı jaǵdaı jasalýda? Qalalyq dene tárbıesi jáne sport bóliminiń basshysy Evgenıı Goncharovtyń aıtýynsha, qazir Aqtóbede 40-tan astam muz aıdyny jumystaryn bastap ketipti. Onyń 5-i hokkeı qorapshasymen qorshalǵan. Jalpy, bıylǵy qysta barlyǵy 60 muz aıdynyn ashý kózdelýde.
– Aqtóbede muz aıdyndary mektepterdiń aýlalarynda, qalaǵa qarasty aýyldyq okrýgterde ornalastyryldy. Sondaı-aq, jeke kásipkerler de qysqy ýaqytty tıimdi paıdalanýǵa óz úlesterin qosyp, muz aıdyndaryn jasaýdy daǵdyǵa aınaldyryp keledi. Ortalyq saıabaqta konkıdi 300 teńgege jalǵa alýǵa bolady.
Muz aıdyndarynyń kópshiligi fýtbol alańdaryna jasaldy. Aýa raıyna baılanysty jyldyń sońyna deıin barlyq 60 muz aıdyny iske qosylady, – deıdi ol.
Jaqynda «Mega Aqtóbe» oıyn-saýyq ortalyǵynyń aýmaǵy arqyly ótetin Sazdy ózeniniń ústinen muz aıdyny jáne Tuńǵysh Prezıdent atyndaǵy ortalyq saıabaqta hokkeı alańy ashyldy.
Sondaı-aq, saıabaqta balalarǵa arnalǵan eki muz syrǵanaǵy salynýda. Mundaǵy hokkeı muz aıdyny barlyq zamanaýı talaptarǵa saı salynǵan. Arnaıy aıaq kıim aýystyratyn jáne tamaqtanýǵa arnalǵan oryndar bar.
Aqtóbelikter «Ferro» sport klýbynda, A.Pýshkın atyndaǵy saıabaqta, «Grın Lend» demalys bazasyndaǵy muz aıdyndaryna, al shaıba qýyp, hokkeı oınaǵysy keletinder qorapshasy bar aıdyndarǵa bara alady. Búgingi tańda Alǵa, Shalqar, Hromtaý aýdandarynda da hokkeı alańdary ashyldy. Bul úrdis basqa aýdandarda jalǵasyn tabýda.
Osylaısha oblysta qysqy sport túrlerimen aınalysýǵa kóńil bólinýde. Aqtóbede Muz saraıy qurylysy salynyp jatyr. Bolashaqta bul nysan da konkı sportymen aınalystyndarǵa esigin aıqara ashpaq. Qysqasy, Aqtóbe muzqalaǵa aınalady.
Satybaldy SÁÝIRBAI,
«Egemen Qazaqstan»
AQTО́BE