Qostanaıdaǵy óndiris sehtarynyń birinde úsh gaz balony jarylyp, keńseniń qabyrǵasy qulap, órt shyqty. Sonyń saldarynan kúzetshi 2-3 satydaǵy kúıik jaraqatyn aldy. Gaz ballony jarylǵan qaı seh ekenin tótenshe jaǵdaılar departamenti ashyp dádeldegen joq. Bul Qostanaıda alǵash ret bolyp otyrǵan oqıǵa emes.
Kúzde oblys ortalyǵyna jaqyn Zatobol kentindegi jeke úıde jarylǵan gaz ballonynan úsh adam zardap shegip, onyń ishinde erli-zaıyptylar aýyr kúıikten qaıtys bolǵan edi. Al olardyń inisi áli kúnge deıin jaraqattan em alyp júr. Keıin tótenshe jaǵdaılar departamentiniń mamandary anyqtaǵandaı, ballonnan ketken gaz osyndaı qasiretke soqtyrǵan.
Tótenshe jaǵdaılar departamentiniń baspasóz qyzmeti taratqan eskertý paraqshasynda gaz ballonyn tasıtyn kásipkerler de, tutynýshylar da onyń qaýipsizdik erejelerine mán bermeıtinin aıtqan. Gaz ballony 85 paıyzdan artpaıtyndaı etip toltyrylýy qajet. Ydys toltyrylardyń aldynda muqııat tekserilýi kerek. Barlyq qaýipsizdik erejeleri saqtalýy úshin arnaıy tolyqqandy gaz quıý stansasy bolýy tıis, biraq jeke qurylymdardyń kóbinde ol joq.
Názıra Járimbetova,
«Egemen Qazaqstan»