Qyzylorda oblystyq densaýlyq saqtaý basqarmasy medısınalyq qyzmettiń ýaqytynda kórsetilýi, onyń qoljetimdiligi, sondaı-aq sapalylyǵy úshin júıeli keshendi úlgi qurylymyn qalyptastyryp jatyr. Bul týraly Qyzylorda oblysynyń densaýlyq saqtaý basqarmasynyń basshysy Aqmaral Álnazarova habarlady.
«Osy úlgini júzege asyrý úshin jalpy ólim-jitim sebepteriniń 52%-yn quraıtyn aýrýlardyń 5 negizgi nozologııasy boıynsha (mıokard ınfarkty, mı qan aınalymynyń buzylýy (ınsýlt), qaterli isikter, jaraqattar, júkti áıelder men perınataldyq kezeńniń patologııalary) jol kartalary ázirlendi. Ár jol kartasy boıynsha syrqattyń jaı-kúıine, medısınalyq kómek kórsetý sapasyna, mamandar men materıaldyq-tehnıkalyq resýrstardyń qamtamasyz etilýine baǵalaý júrgizildi. Osyǵan baılanysty birinshi deńgeıdegi BMSK (emhanalarda) uıymdarda barlyq 5 baǵyt boıynsha 89 mamandandyrylǵan kabınet ashyldy», – dedi Aqmaral Álnazarova.
Ekinshi deńgeıde kómek kórsetýde aýyr ekstragenıtaldi aýrýlarmen bosanǵandarǵa, jaraqat alǵandarǵa, ınsýlt alǵan naýqastarǵa ońaltý jumystaryn júrgizý úshin reabılıtasııalyq jáne qaıta qalpyna keltirý bólimsheleri ashyldy. Barlyq aýdandyq aýrýhanalarda aýdanaralyq travmatologııalyq bólimshelerdi medısınalyq qural-jabdyqtarmen jabdyqtaý jumystary júrgizildi. Osy jyldyń basynan bastap, qaterli isikke shaldyqqan aýyr naýqastardyń ómirin uzartý, kútýge baǵyttalǵan pallıatıvtik kómek kórsetý úshin onkologııa ortalyǵynda 30 tósekke pallıatıvtik bólimshe (hospıs) ashyldy jáne aýdandyq aýrýhanalarda arnaıy 35 tósek-oryn bólindi.