Jaqynda Qyrǵyzstan qazaqtarynyń qaýymdastyǵy Qyrǵyzstan halyq Assambleıasynda Qazaqstan Respýblıkasy táýelsizdiginiń 25 jyldyǵyna arnalǵan dóńgelek ústel ótkizdi. Merekelik is-sharaǵa memlekettik organdarynyń ókilderi, qoǵam qaıratkerleri, Assambleıanyń quramyndaǵy ulttyq mádenı ortalyqtardyń jetekshileri qatysyp, ózderiniń quttyqtaýlaryn, Qazaqstannyń jetistikteri týraly pikirlerin bildirdi.
Dóńgelek ústeldiń ashylýynda Qyrǵyzstan qazaqtary qaýymdastyǵy tóraǵasynyń orynbasary Tileýqor Boshymova Qazaqstannyń shırek ǵasyr ishindegi ótken joly týraly keńinen baıandap berdi. Al Qyrǵyzstan halyq Assambleıasy keńesiniń tóraǵasy Toqan Mamytovtyń quttyqtaýmen bastalǵan sózin jurt uıyp tyńdady. Memlekettik úlken qyzmetterde bolǵan elge sózi ótimdi tulǵalardyń biri T.Mamytov Prezıdent Nursultan Nazarbaevtyń bastamasymen egemendiktiń alǵashqy jyldarynda Qazaqstannyń ıadrolyq qarýdan óz erkimen bas tartqanyn, munyń tipti álemdik qoǵamdastyqta máni asa zor oqıǵa bolǵanyn atap kórsetti. Ekinshiden, dedi ol, N.Nazarbaev sarabdal saıasatker, kemeńger Kóshbasshy ekenin aıqyn tanytty. Bulaı dep otyrǵan sebebim, Qazaqstan der kezinde júrgizilgen ekonomıkalyq, saıası, mádenı-rýhanı reformalarynyń arqasynda úlken jetistikterge jetti. Qazaqstannyń ósip-órkendegeni qazaqstandyqtar úshin ǵana emes, aımaq elderi úshin, onyń ishinde bizdiń Qyrǵyzstan úshin de asa mańyzdy. Qyrǵyz ben qazaq dili de, tili de, dini de bir, bir ózennen sý ishken halyq, barsaq – bazarymyz, kómilsek mazarymyz da ortaq.
Dóńgelek ústel basynda sóz sóılegen basqa da adamdar, qazaq dıasporasynyń ókilderi ózderiniń Qazaq eline degen tileýlestigin bildirdi. Jıynǵa Bishkek qalasynan otyz shaqyrym jerdegi «Ozernoe» aýylynan arnaıy kelgen 92 jastaǵy Qanı Altynbekov Qazaqstannyń tolaǵaı tabystary ózin árqashan da qýanyshqa bóleıtinin jetkizdi. О́mir boıy dıqanshylyqpen aınalysqan aqsaqaldyń ata-anasy Qyrǵyzstanǵa 1932 jyly qonys aýdarypty. Qarııa Qazaqstandy árdaıym alǵa tartyp kele jatqan Elbasy Nursultan Nazarbaevqa óziniń atalyq aq batasyn berip, Qazaqstandy ósip-órkendetý jolyndaǵy eńbegine jemis tiledi.
Nazarbek BAIJIGITOV,
respýblıkalyq «Qyrǵyz Týy» gazetiniń jaýapty hatshysy