Kólik salasynyń bolashaq mamandary aǵymdaǵy jyly «Magıstral» salalyq baǵdarlamasy boıynsha jıyrma grant pen on ataýly stıpendııaǵa ıe boldy, dep habarlady «Qazaqstan temir joly» UK» AQ.
«Qazaqstan temir joly» UK» AQ prezıdentiniń ataýly stıpendııalary jáne erekshe granttar jyl saıyn bólinedi, olardy saladaǵy talap etiletin mamandyqtar boıynsha bilim alatyn kolledjder men joo-nyń úzdik stýdentteri alady. Granttardyń basym kópshiligin Qazaq kólik jáne kommýnıkasııalar akademııasy men onyń kolledjderiniń stýdentteri ıelendi», – delingen habarlamada.
Kompanııada óndiristiń aǵymdaǵy jáne bolashaq qajettilikterine sáıkes mamandardy daıarlaýǵa joǵary kóńil bólinedi.
Atap óteıik, atalǵan baǵdarlama granttary boıynsha 130-dan astam jas maman bilim alǵan. Osy ýaqyt ishinde, budan bólek, 60 ataýly stıpendııa berilgen. Osy rette Kompanııanyń shaǵyn stansııalary men razezderinde, aıdaý pýnktterinde jumys isteıtin qyzmetkerlerdiń balalary 40 granttyń ıelenýshisine aınaldy. Grant ıelenýshilerdiń qatarynda óndiriste múgedektik alǵan jumysshylardyń da balalary bar.
Budan bólek, bilim berý granttary stýdentterge ǵana emes, sonymen qatar, Kompanııa úshin basym mamandyqtar boıynsha kúndizgi jáne syrttaı bólimde bilim alatyn Kompanııa qyzmetkerlerine de beriledi. Mysaly, bıylǵy jyly QTJ 18 qyzmetkeri «Kólik qurylysy», «Avtomattandyrý jáne basqarý», «Kóliktegi logıstıka», MBA, DBA mamandyqtary boıynsha magıstratýra jáne doktorantýra baǵdarlamalary boıynsha bilim alý granttaryn jeńip aldy.