Búgin Reseı Qorǵanys mınıstrligiń Sochıden ushqan Tý-154 ushaǵy radarlardan joǵalyp ketti. Keıin ushaqtyń apatqa ushyrap, Qara tańizge qulaǵany belgili boldy.
Mınıstrliktiń habarlaýynsha, onda segiz ekıpaj múshesi men 84 jolaýshy bolǵan. Olardyń arasynda áskerılermen qatar Aleksandrov ansambli, "Birinshi arna", "Zvezda" jáne NTV telearnalarynyń jýrnalısteri de bar. "Tý-154 ushaǵynda Reseıdiń Qarýly kúshiniń áskerı qyzmetkerlerimen qatar Jańa jylmen quttyqtaý úshin Sırııanyń "Hmeımım" áýe bazasyna bara jatqan Aleksandrov ansambli, reseılik BAQ-tyń toǵyz ókili bolǵan", deıdi RF Qorǵanys mınıstrligi. Sonymen qatar, mınıstrlik taratqan habarlamada ushaq apatynan tiri qalǵandar joq ekeni aıtylǵan.
Aleksandrov ansambli týraly ne bilemiz?Reseı áskeriniń A.V.Aleksandrov atyndaǵy án jáne bı ansambli - Reseıdiń eń iri shyǵarmashylyq ujymy. Ol 1928 jyly 12 qazanda qurylǵan. Sodan beri ansambl quramy da, ataýy da birneshe ret ózgerdi.
Alǵashynda 12 adamdyq bolǵan ujymnyń quramy 1937 jyly 274 adamǵa jetken. 1948 jyly 313 bolsa, qazir 186 adamnan turady. Al ushaqqa mýzykanttardyń 68-i mingen. Sońǵy málimetter boıynsha, ansambldiń kórkemdik jetekshisi Valerıı Halılov ta ushaqta bolǵan.
Aleksandrov ansambli 1935 jyly 27 qarashadan bastap M.V Frýnze atyndaǵy Qyzyl ásker Ortalyq úıiniń áskerı ánder ansambli dep atalǵan. 1949 jyldan bastap onyń negizin salýshysy A.V.Aleksandrov qurmetine atala bastaǵan. A.V.Aleksandrov atyndaǵy Keńes Áskeriniń án jáne bı ansambli 1978 jyly elý jyldyǵy qarsańynda eń joǵary kásibı attestasııadan ótip, akademııalyq degen ataý aldy. 1998 jyldan bastap Reseı áskeriniń A.V. Aleksandrov atyndaǵy án jáne bı akademııalyq ansambli dep atala bastady.
Doktor Lıza kim?"Ádil kómek" ("Spravedlıvaıa pomosh") qorynyń jetekshisi Glınka Elızaveta Petrovnanyń ushaqta bolǵany tek apatqa ushyraǵandardyń tolyq tizimi jarııalanǵanda ǵana belgili boldy. Doktor Lıza atanyp ketken Elızaveta Glınka Reseı prezıdenti janyndaǵy Azamattyq qoǵam men adam quqyǵyn damytý keńesiniń múshesi, Reseıge belgili fılantrop, mamandyǵy - dáriger-reanımatolog.
Doktor Lıza 2007 jyly "Ádil kómek" qaıyrymdylyq qoryn qurdy. Bul qor onkologııalyq jáne basqa da aýyr naýqasqa shaldyqqan, turmysy nashar adamdarǵa, úısizderge materıaldyq qoldaý men dárigerlik kómek kórsetedi. Qor eriktileri apta saıyn muqtaj jandarǵa tamaq, dári-dármek taratyp, tegin medısınalyq jáne zańgerlik kómek kórsetedi.
2009 jyly REN-TV Elızaveta Glınka týraly "Doktor Lıza" atty derekti fılm túsirdi. Al bıyl 8 jeltoqsanda Elızaveta Glınka quqyq qorǵaý qyzmetindegi erekshe jetistikteri úshin Memlekettik syılyq laýreaty atanǵan bolatyn.
Jýrnalısterden kimder boldy?NTV telearnasynan ushaqta korrespondent Mıhaıl Lýjeskıı, operator Oleg Pestov, dybys operatory Evgenıı Tolstov bolǵan.
"Birinshi arnanyń" baspasóz qyzmeti apatqa ushyraǵan ushaqta úsh qyzmetkeri bolǵanyn habarlady. Olar: arna tilshisi Dmıtrıı Rýnkov, operator Vadım Denısov, dybys operatory Aleksandr Soıdov.
Bulardan bólek bortta «Zvezda» telearnasynyń tilshisi Pavel Obýhov, operator Aleksandr Sýranov, operatordyń kómekshisi Valerıı Rjevskıı bolǵan.
Daıyndaǵan Gúlnur Qýanyshbekqyzy,
"Egemen Qazaqstan"