Joǵary Eýrazııalyq ekonomıkalyq keńestiń Sankt-Peterborda ótetin otyrysynda Armenııa, Belorýssııa, Qazaqstan, Qyrǵyzstan jáne Reseı basshylary odaqtyń eki jylǵy jumysyn qorytyndylap, atalmysh yqpaldastyq uıymynyń odan ári damý baǵyttaryn aıqyndaıdy, dep jazady TASS.
Sammıttiń basty oqıǵasy EAEO-nyń Kedendik kodeksi týraly shartqa qol qoıý bolǵaly otyr. Úsh jyl kóleminde ázirlengen jańa kodekste kedendik operasııalardy aqparattandyrýǵa jańa tásildemeler, qaǵaz túrindegi qujat aınalymyn jáne syrtqy ekonomıkalyq qyzmetke qatysýshylardyń laýazymdy tulǵalarmen baılanysyn azaıtý maqsatynda bıznes úshin memlekettik organdarmen ózara is-qımyldyń yńǵaıly algorıtmi engizilgeli otyr.
Sondaı-aq odaqqa múshe elderdiń barlyǵyna arnap kedendik operasııalar barynsha birdeılendiriledi. Jańa qujat kúshine engen soń EEK barlyq elder úshin biryńǵaı baj salyǵynsyz saýdanyń joǵarǵy ózindik qunyn jáne salmaqtyq shekti aıqyndamaq.
Taraptar ózderiniń qalaýy boıynsha halyqaralyq poshta jóneltilimderi, sondaı-aq ekspress-tasymaldaýshylar arqyly tasymaldanatyn taýarlarǵa qatysty ulttyq deńgeıde bajsyz tasymaldaýdyń barynsha tómen normalaryn bekite alady.
Odaqtyń músheleri jańa Kedendik kodeks kúshine engen soń, 2018 jyly EAEO elderine sheteldik ınternet-dúkenderden bajsyz tasymaldaýdyń shegi birtindep tómendeıtindigine kelisti. EAEO Kedendik kodeksi 2017 jyldyń 1 shildesinen bastap kúshine enedi dep josparlanǵan.