Kúni keshe ǵana Astananyń «Barysy» óz aıdynynda Magnıtogorskiniń azýly «Metallýrgin» qabyldap, 5:3 esebimen jeńiske jetken. Matchtyń qorytyndysy jaıly kanadalyq qaqpashy Kevın Pýlen aıtyp berdi.
«Jankúıerler úshin qyzyqqa ári tartysqa toly oıyn bolsa, biz aýyr match ótkizdik. «Shyǵys» konferensııasynda kósh bastap kele jatqan azýly komandaǵa qarsy turý ońaı emes. Shabýylda sátti óner kórsetip, qorǵanysqa da saqtyqpen qaradyq. Osynyń arqasynda úsh upaı alyp, pleı-off kezeńine joldama alatyn orynnan qozǵalmadyq. Degenmen, 7-8-oryndardyń arasy da óte alys emes. Bir oıynnan múlt ketseń ókshelep kele jatqan ujym basyp ozady da ketedi», – deıdi kanadalyq qaqpashy.
«Metallýrg» sapynda óner kórsetetin úzdik shabýylshylardyń biri Sergeı Mozıakın Kevın Pýlenge alǵashqy shaıbany soqqan bolatyn. Onyń oıyny jaıly: «Oıynǵa jan-tánińmen berilgen kezde, kimniń myqty, kimniń osal ekenine mán bermeısiń. Árıne, Mozıakın bul týrnırde kópten beri oınap keledi, tájirıbesi de mol», – dedi.
Sporttyń qaı túri bolmasyn bas jattyqtyrýshynyń qoldanǵan taktıkasy, ustanǵan jospary óte mańyzdy. Al Edýard Zankoves azýyn aıǵa bilegen «Metallýrgke» qarsy qandaı aıla qoldanypty?
«Birinshi kezeń biz úshin óte sátti boldy. Mundaı ujymǵa qarsy 20 mınýttyń ishinde tórt birdeı gol soǵý ońaı jumys emes. Shamasy, bul maýsymda dál osyndaı nátıje kórsetpegen shyǵarmyz. Úziliste bapkerimiz jınaqylyq tanytyp, qarsylastarymyzdyń bireýin de nazardan tys qaldyrmaý kerektigin eskertti. Sebebi, tájirıbeli komanda oraıy kelgen sátterdi jibere qoımaıtyny anyq. Al úshinshi kezeńde barynsha saq oınaý kerektigin, emosııaǵa berilip, tártip buzbaýymyzdy keńes etti», – dedi kanadalyq legıoner.
Astanalyqtar birinshi kezeńde jaýapsyz tórt gol soqqanmen, match barysynda úsh shaıba jiberip aldy. Mundaı sátte qolda turǵan jeńistiń sýsyp ketýi ǵajap emes.
«Qonaqtardyń dál osyndaı kórsetkishke jetýi oıynnyń bir bóligi. Ekinshi kezeńde olar birneshe ret oıynshy basymdyǵyna ıe bolyp, utymdy paıdalandy. Bul kezde ashýǵa berilip, sabyrsyzdyq tanytýdyń sońy úlken qatelikke ákeledi. Sebebi, matchtyń aıaqtalýyna áli biraz ýaqyt bar. О́zimizdiń shabýylymyzǵa qarap, jeńisimizge senimdi bola tústim», – dedi «Barys» oıynshysy.
Suhbat barysynda jankúıerlerge komandasy neǵurlym kóp gol soqqany unaıtyny aıtyldy.
«Árıne, iri eseppen utqanymyz jaqsy. Bir jaǵynan ózińe úmit artqan jandarǵa qarap, qaqpańdy goldan aman ustaǵyń keledi. Degenmen, qarsy ujymnyń shabýyly kezinde bar ónerińdi pash etkenge ne jetsin!» – dedi ol.
Kevın Pýlenniń Qazaqstanǵa kelgenine birneshe aıdyń júzi boldy. Jańa komandaǵa, jańa elge birden úırenisip ketý kimge bolsyn qıyndaý.
«Eki eldiń ómir súrý salty eki túrli bolǵanmen, uqsas tustary da joq emes. Máselen, aýa raıy: qaqaǵan qystyń aıazy, tolassyz jaýǵan qar. Qazir otbasym qasymda. Sondaı-aq, Astanada jaqyndarymmen qydyratyn jerler óte kóp. Mysaly, bizge «Han Shatyrda» kóńil kótergen unaıdy. Balalarymdy oıyn avtomattarynan áreń aldap alyp shyǵamyn. Al jasandy jaǵajaıdyń orny tipten bólek. Qystyń sýyǵynda tońyp kelgende tropıkalyq elderdiń birine túsip ketkendeı bolasyń», – dedi.
«Úsh aıǵa jýyq ýaqyt ishinde Qurlyqtyq hokkeı lıgasyna úırendim dep senimmen aıta alamyn. Ylǵı da ózińdi jańa qyryńnan kórsetken jaqsy. Árıne, stıli, oıyn máneri soltústik amerıkalyqtardan erekshelenedi. Tek azdap sabyr saqtaı bilip, jattyqtyrýshynyń aıtqanyn buljytpaı oryndasań bolǵany. Ulttyq hokkeı lıgasy (UKL) men Qurlyqtyq hokkeı lıgasyndaǵy (QHL) aıyrmashylyq muz aıdynynyń kóleminde. UKL-diń kólemi qysqa bolǵandyqtan, sáıkesinshe oılanýǵa da ýaqytyń az. Aıdynnyń qaı tusynan soqqy jasasa da golǵa aınalýy ábden múmkin», – dedi legıoner.