Boks degen bekzada ónermen osy kúni er jigitter ǵana emes, názik jandylar da aınalysa bastady. Muhamed Álıdiń qyzy Leıla Álı, ózimizdiń Qaraǵandynyń týmasy Natalıa Ragozına – kásipqoı bokstyń sheberi retinde álemdik deńgeıde tanymal. Halyqaralyq áýesqoı boks federasııasy (AIBA) osydan tórt jyl buryn qyzdar boksyn Olımpııa oıyndaryna qosty. Sodan beri eki Olımpıada ótip, Qazaqstan qorjynyna Marııa Volnova men Darıǵa Shákimova qola júlde salyp úlgerdi.
О́kinishke qaraı, Rıodaǵy jazǵy Olımpııa oıyndaryna 60 kıloda joldama ala almadyq. Astanadaǵy lısenzııalyq álem birinshiligine el chempıony Nazym Ishanova emes, odan jeńilgen Rımma Volosenkonyń qatysqany jankúıerlerdiń narazylyǵyn týǵyzdy. Onyń ústine, Volosenko joldama ala alǵan joq. Bul jaıt sol kezde buqaralyq aqparat quraldarynda qyzý talqylanǵan-dy. Sol oqıǵadan keıin, óz-ózine kele bastaǵan Ishanovany Jańa jyl qarsańynda sózge tartyp kórdik.
Aqjaıyqta dúnıege kelgen sportshy qyzdan aldymen meshin jylynyń saıystaryna sholý jasaýyn ótingenbiz.
– Bıylǵy jyl negizinen jaqsy bastalǵan edi. Aqpan aıynda elordada Qazaqstan chempıonatyn uttym. Odan keıin Qytaıdaǵy lısenzııalyq týrnırge qatystym. Biraq azdaǵan sáttilik jetispeı, onda Olımpıada joldamasyna ıelik ete almadym. Al mamyr aıynda Astanada ótken álem birinshiligine «bir kisilerdiń arqasynda» qatysa almadym. Ol týraly endi esime de alǵym kelmeıdi, – deıdi N.Ishanova.
Olımpıadaǵa qatysamyn degen úmiti sý sepkendeı basylǵan soń, boksshy qyz biraz ýaqyt ishteı qınalǵan. Osy kezde ata-anasynyń qoldaýy kóp demeý bolypty.
– Meni árdaıym qoldaı biletin ákem men anam bar. Qıyn kezde sol kisiler demeý boldy. Sonyń arqasynda óz-ózime kelip, jattyǵýǵa qaıta kiristim. Qazaqstan chempıonaty men Qytaıdaǵy týrnırden keıin biraz ýaqyt sharshy alańǵa shyqpadym. Bapkerim ekeýmiz jaz boıy daıyndaldyq. Sosyn tamyzda Mahachkaladaǵy týrnırge qatysyp, birinshi orynmen oraldym. Keıinnen stýdentter arasyndaǵy álem chempıonaty men munaıly elder arasyndaǵy álem kýbogynan qola júlde enshiledim. Komandalastarymmen sálemim túzý. Jaqyn qurbylar sekildi aralasatyn qyzdar da az emes. Quramanyń aǵa bapkerimen de qarym-qatynasymyz jaqsara tústi. Ol kisi qatesin túsindi, – deıdi boksshy qyz.
Shynashaqtaı qyzdyń bokspen aınalysýy da qyzyq. Ákesi Beıbit bapker retinde kóptegen daryndy jastardy daıyndaǵan. Biraq baptaǵan balalarynyń kóbisi sońyna deıin sportty jalǵastyrmaı, basqa salalarǵa ketip qalatyn kórinedi. Ákesi úıine kelgende eńbeginiń zaıa ketkenin aıtyp, óz renishin bildirip otyrady eken. Bul jaǵdaı qyzyna qatty áser etip, Oraldaǵy «Daryn» mektebinde úzdik oqyp, mýzyka jáne sýret salýmen aınalysyp júrgen Ishanovanyń ańsary birjola boksqa aýady.
Ol bokstan bólek, mýzykamen de aınalysady. Qazaqtyń ulttyq aspaby dombyrada oınaıdy. Qazirgi kezde qobyzdy úırenip júr eken. «Mýzykada da, boksta da yrǵaq degen túsinik bar. Muny sezine bilseń, jetistikke jetýge kóp kómegi tıedi. Sol sebepti maǵan óner men sportty baılanystyrý qıyn emes. Ásirese, qazaqtyń kúılerin oryndaǵandy jaqsy kóremin», – deıdi ol. Bos ýaqytynda konkı tepkendi jaqsy kóredi eken. О́zge sport túrlerinen erkin kúres pen grek-rım kúresine qyzyǵatynyn aıtady.
N.Ishanova osy ýaqytqa deıin tórt ret el chempıonatyn utqan. El spartakıadasynyń jeńimpazy. Úsh márte álem chempıonatyna qatysyp, eki ret qola júldeger atanǵan. Ulttyq quramada 60 kıloǵa óner kórsetedi. Bul kúnderi Oraldan Atyraýǵa qonys aýdarǵan boksshy qyz qazirgi kezde Halel Dosmuhamedov atyndaǵy Atyraý memlekettik ýnıversıtetiniń dene shynyqtyrý fakýltetiniń ekinshi kýrsynda oqıdy.
– Aldaǵy 2017 jyly kezekti ret Qazaqstan chempıonatynda top jarýdy kózdeımin. Sosyn Azııa chempıonaty bar. Odan bólek, kóptegen halyqaralyq jarystar ótedi. Sol jarystardan júlde salyp, el mereıin asyrýdy kózdeımin, – dep Nazym Ishanova keler jylǵa da zor úmitpen qaraıtynyn ańǵartty.
Biz de óz kezegimizde sportshyǵa sáttilik tilep, Jańa jylda jańa tabystarǵa jete berýine tilektestigimizdi bildirdik.
Bek TО́LEÝOV